“Mëngjeset e majit”

Sipas historianëve, teksti është gjetur në një nga periodikët patriotikë të fillimit të shekullit të XX, për shqiptarët e Rumanisë dhe Bullgarisë.

“Është interesante ta theksojmë sepse edhe si këngë dhe si tekst, janë e vetmja deri më sot ku gërshetohet dashuria për individin dhe dashuria për atdheun”, thotë Niko Kotherja, drejtor i Muzeut Kombëtar të Arsimit.

Ndonëse zyrtarisht titulli është “Mëngjeset e majit”, shumë vetë këtë këngë e identifikojnë me një titull tjetër, marrë nga vargjet e saj, “Dua më shumë Shqipërinë”.

Për herë të parë, kënga është kënduar dhe regjistruar në vitin 1923 nga Spiridon Ilo, në SHBA. Ilo, sipas dëshmive të kohës, ka qenë firmëtar i pavarësisë, nipi i Marigosë që qëndisi flamurin e ngritur në Vlorë dhe autor i tekstit dhe muzikës së disa këngëve patriotike, mes tyre ajo e titulluar “Eja mblidhuni këtu, këtu!”.

“Me rastin e themelimit të shoqërisë së parë diskografike shqiptare ‘Albanian Phonograph Records’ në Nju Jorkun e vitit 1923, ai e këndon vetë këtë këngë dhe e regjistron në një pllakë gramafoni”, shton më tej Niko Kotherja.

“Mëngjeset e majit”, para se të bëhej e njohur në të gjithë Shqipërinë, është kënduar filimisht nga artistë të ndryshëm korçarë dhe që nga vitet ‘50 prej korit “Lira”. Për Koço Gramenon, njërin prej pjesëtarëve të këtij kori, i cili është dhe nipi i Mihal Gramenos, kjo këngë mbart vlera sa artistike, aq dhe patriotike.

“Është një këngë mes himnit dhe patriotizmit e lirikës, që autorët korçarë me atë shpirtdashurinë dhe estetizmin e tyre të asaj kohe, e kanë kompozuar jo vetëm për Korçën. Unë për vete mbaj mend që e kam kënduar që fëmijë, e si puna ime sot e këndojnë brezat dhe mbarë Shqipëria”, thotë Koço Grameno, pjesëtar i korit “Lira”.

“Mëngjeset e majit”, një këngë e dashur, prej mëse një shekulli vazhdon të këndohet brez pas brezi nga shqiptarët, që duan më shumë Shqipërinë.

Top Channel