Lajmet e mira të javës

Thirrja për ndihmë e 17-vjeçares Ambra Meda, e cila vuan nga një sëmundje shumë e rrallë ka bërë të mobilizohen jo pak njerëz. Shoqet e shkollës së saj nga gjimnazi “Sami Frashëri” në Tranë kanë ndërmarrë nisma për të mbledhur para për Ambrën. Gjithashtu, kampioni i botës në Kik Boks, Ismail Keta, tregoi në studion e “Pasdites” se ka vendosur të organizojë një ndeshje vetëm për të siguruar para në ndihmë të 17-vjeçares. Kurimi i Ambra Medës kushton 180 mijë euro.

Vetëm 4 vjeç dhe Elliot Prior ka marrë vëmendjen e të gjitha mediave të botës. Falë guximit, ai arriti të zmbrapste terroristët dhe të shpëtonte jetën e mamasë dhe motrës së tij në pengamrrjen në Kenia. Me një qetësi të habitshme 4 vjeçari qëndron para një terroristi që i kishte plagosur të ëmën dhe i thotë “Ti je njeri shumë i keq”. Agresori që me sa duket kuptonte anglisht i jep një çokollatë dy fëmijëve dhe i lejon të bashkohen me mamanë e tyre.

Salma, poetesha e famshme indiane rrëfeu në “Pasdite në Top Channel” se dashuria për dijen, letërsinë dhe emancimpin e gruas i ka dhënë forcë për të mos u dorëzuar në jetën e saj të vështirë. E martuar në një moshë fare të re, në një ambient ku dhunohej sistematikisht nga burri ajo nuk hoqi dorë nga të shkruarit e poezive. Sot, Salma drejton një zyrë e cila ndihmon gratë që janë të detyruara të martohen jashtë vullnetit të tyre dhe të mbahen në skllaveri brenda katër mureve të shtëpisë.

Top Channel