Jorgo Katidis, futbollisti i cili festoi një gol të tijin me një përshëndetje naziste, është pezulluar deri në fund të sezonit edhe nga klubi ku aktivizohet aktualisht, AEK-u i Athinës.
Katidis, i cili është pezulluar përjetë nga kombëtarja e Greqisë për këtë gjest, ka marrë një tjetër dënim të rëndë që nuk do e lejojë të luajë më futboll deri në përfundim të sezonit aktual.
“AEK-u ka vendosur të lërë jashtë skuadre futbollistin Jorgo Katidis deri në përfundim të kampionatit 2012/2013. Ky është dënimi më i rëndë i mundshëm”, shkruhet në një komunikatë të klubit grek.
Gjithashtu nuk është e sigurtë vazhdimësia e 20-vjeçarit në skuadër edhe pas përfundimit të sezonit: “Vendimi për vazhdimësinë e tij do të merret në verë, pasi t’i jepet mundësia të tregojë se sjellja e tij ishte fryt i papjekurisë.”
Vetë futbollisti kërkoi falje pasi kuptoi impaktin që pati gjesti i tij: “Ndihem shumë keq për ata njerëz që janë ofenduar nga budallallëku i gjestit tim.”
Top Channel
