Mbi 100 persona kanë përfunduar në pranga në lidhje me torturimin dhe më pas djegien e një 20-vjeçarje të akuzuar për “ushtrim të magjisë së keqe” në Guinenë e Re.
Vrasja horror ndodhi në provincat perëndimore të vendit. Mediat vendase shkruajnë se operacioni i policisë i ndërmarrë në orët e para të ditës së premte prangosi mbi 100 persona. Shumë prej tyre dyshohet se kanë qenë aktivë në ekzekutimin e pashembullt të 20-vjeçares, nënë e një fëmije, ndërsa të tjerët për nxitje të krimit të rëndë.
20-vjeçarja, e quajtur Kepari Leniata “u dënua” nga turma e njerëzve. Ajo akuzohej se kishte shkaktuar vdekjen e një fëmije 6-vjeçar duke përdorur praktika të magjisë. 6-vjeçari ishte shtruar në spital me dhimbje të forta stomaku ku ndërroi jetë.
Pas kësaj, e reja u mor me forcë nga banesa e saj nga një turmë burrash dhe në sy të të afërmve. U hodh në mes të rrugës, u dhunua me hekur të nxehtë e sende të tjera të forta, u spërkat me benzinë e më pas iu vu flaka.
Policia dhe zjarrfikëset kanë mbërritur menjëherë në vendngjarje, por nuk kanë mundur të ndërhyjnë për shkak se janë ndaluar nga turma. Cituar nga mediat vendase, kreu i policisë lokale deklaroi pas ekzekutimit makabër, se rasti po trajtohej si një vrasje dhe se shumë shpejt përgjegjësit e saj do të viheshin përpara drejtësisë.
Ndërkohë e përditëshmja vendase, “The National” përvec tronditjes së publikut për ngjarjen aspak të zakontë, thotë se 20-vjeçarja ishte nënë e një foshnje 8-muajshe.
Top Channel
