Programi i radikalëve grekë

Lideri i tyre 37 vjecar, Aleksis Tsipras, ka kërkuar votën e grekëve për të zhbëre qysh në 18 qershor marreveshjen e huasë, në kundërshtim me socialistët dhe konservatorët që kërkojnë votën për ta zbatuar atë, ka deklaruar ai.

“Nuk ka asnjë ekonomist serioz në Europë apo në botë që nuk e pranon se marrëveshja e huasë është një pilot automatik drejt katastrofës së përgjithshme. Ajo është një mekanizëm i falimentimit përfundimtar dhe do të detyrojë që vendi të dalë vullnetarisht nga eurozona”, tha Alexis Tsipras.

Tsipras ka theksuar faktin se nuk ekziston mundësia e dëbimit të një vendi nga euro, vetëm nëse ai shtet do e kërkojë vetë. “Nëse do të vazhdojë të zbatojë marrëveshjen e huasë, Greqia me siguri do të kërkojë të largohet nga hapësira e monedhës së përbashkët. Nuk shpëton dot i sëmuri nëse i ul dozën e ilacit vdekjeprurës, por shërohet kur ja ndryshon ilacin”, ka shtuar ai.

Aleanca e së Majtës Radikale do të kërkojë sapo të vijë në fuqi rinegocimin e borxhit dhe programe të reja zhvillimi. Në program flitet se do të rriten përsëri në nivelet e mëparshme rroga minimale dhe asistenca sociale, do të ulet TVSH tek ushqimet e konsumit të përditshëm dhe do të hiqen disa prej taksave të padrejta mbi të varfërit.

“Ne duhet që më në fund të ndalojmë të tatojmë të varfërit në këtë vend dhe të tatojmë të pasurit, ata që ju shmangen taksave”, shtoi Tsipras.

Në këtë kuadër ai ka deklaruar se do të shtetëzojë bankat si dhe disa prej kompanive kyce për ekonominë e vendit. Pas këtyre deklaratave, bursa greke pësoi menjëherë rënie prej 2.65 pikësh, ndërsa ekonomistët komentojnë se tregjet kërkojnë një qeveri më pro-europiane që do të zbatonte reformat dhe nuk do të sulmonte marrëveshjen e shpëtimit.

“Është e sigurt se tregu nuk dëshiron të ngrije privatizimet, as nuk do ndonjë shtetëzim të kompanive të caktuara,sepse kjo do të nënkuptonte fundit e tyre në tregun e aksioneve, sidomos për bankat, të cilat kanë humbur të paktën 90 për qind të vlerës së tyre”, thotë Nikos Kristodulu, analist financiar.

Tsipras ka deklaruar gjithashtu se do të tatojë kapitalet që kanë ikur nga bankat greke, kryesisht prej të pasurve, do të kryejë një vlerësim të pasurisë së paluajtshme si dhe të pasurive natyrore të vendit, ndërsa njëkohësisht ka premtuar se do të hyjë në bisedime me Turqinë për të shpallur Zonën Eksluzive Ekonomike duke i propozuar Ankarasë edhe një program për reduktimin e armatimeve nga të dy vendet.

Top Channel