Skënderbeu apo Mlada, forcohen vendasit, James në ekip

26/07/2017 00:00

Në vigjiljen e ndeshjes së parë mes Mlada Boleslav dhe Skënderbeut, skuadra vendase është forcuar me lojtarë cilësorë. Korçarët do të synojnë të marrin të paktën barazimin në transfertën e kësaj të enjteje në Europa Lig, për të bërë një tjetër hap drejt fazës së grupeve, por cekët kanë besim te fitorja.

Nikolai Komlicenko, sulmuesi 22-vjeçar i ardhur në huazim nga skuadra ruse e Krasnodarit, është futur me shpejtësi në listën e UEFA-s dhe pritet të jetë në formacion ndaj shqiptarëve. Por nuk është vetëm kaq. Mlada Boleslav ka rikthyer në ekip për dy ndeshjet ndaj Skënderbeut edhe portierin 19-vjeçar Martin Jedlicka. Iu shtua kontigjentit të stafit teknik edhe sulmuesi Eli Babalj që deri pak javë më parë ishte në radhët e skuadrës australiane Adelaide United.

Ndërkohë, pas peripecive burokratike me vonesën e ambasadës për vizë çeke, sulmuesi James Adeniji u pajis me lejen për të hyrë në shtetin e Bashkimit Europian. Ai do të jetë një zgjedhje më shumë për trajnerin Daja të enjten në mbrëmje, duke konsideruar mungesat e Vujovic dhe Lilajt.

Mlada do të luajë ndaj Skënderbeut të enjten në orën 18:00 në stadiumin “Mestsky”, me një kapacitet modest 5 mijë njerëz.

Top Channel