Tërhiqet Kevin Garnett, lamtumirë NBA pas 21 sezonesh

24/09/2016 00:00

Kevin Garnett i thotë mjaft basketbollit. Pas 21 sezonesh në NBA, lojtari i Minnesota Timberwolves deklaroi tërheqjen përfundimtare nga aktivitetet. Garnett u kthye te Minnesota për 8 milionë dollarë me idenë që të luante sezonin e fundit me këtë skuadër, por në fund vendosi që t’i japë lamtumirën basketbollit vetëm pak ditë përpara nisjes së edicionit të ri të kampionatit të NBA.

Kevin Garnett, tashmë 40 vjeçar, ka kaluar 13 vjet e 6 muaj të karrierës së tij në NBA pikërisht të Minnesota. Në vitin 1995 ai u zgjodh nga NBA në draftin e atij viti për t’u shndërruar në një nga basketbollistët më të mirë të këtij kampionati.

Garnett ka marrë pjesë në 15 ndeshje All Star Game dhe është i 17 në renditjen e NBA për numrin e pikëve të shënuara me 26071 të tillë. Ai është i nënti në historinë e NBA për topat në tabelë me 14667 dhe i 17 për sa u përket bllokimeve me 2037.

Kevin Garnett është i treti emër i rëndësishëm që i thotë lamtumirën NBA pas Kobe Bryant dhe Tim Duncan, duke bërë që një epokë e këtij kampionati të shkojë drejt fundit.

Top Channel