PS ‘rikthehet’ në Dibër për falenderim, Rama: “Arbri” nis para zgjedhjeve

Takimi i organizuar në Peshkopi kishte për qëllim mirënjohjen dhe falenderimin për votuesit dibranë për mbështetjen e kandidatit të majtë në zgjedhjet e ditës së dielë, ku Muharem Rama u shpall fitues ndaj Sherefedin Shehut me mbi 4 mijë vota diferencë.

Në fjalën e mbajtur, Kryeministri Edi Rama i është rikthyer premtimit për ‘plagën’ e vjetër të dibranëve; Rrugën e Arbrit.  Rama tha se qeveria që ai drejton nuk dëshiron që të bëjë të njëjtat gabime me borxhet si paraardhësja e Partisë Demokratike  dhe ndaj po studiohen mundësi të tjera për financimin e kësaj rruge. Për herë të parë, ai dha edhe një afat për nisjen e punimeve.

“Ne nuk duam të bëjmë gabimet e Partisë Demokratike që të marrim borxh pas borxhi. Ne duam të ulim borxhin. Dje kam kaluar disa orë me ambasadoren kineze për Rrugën e Arbrit. Ju them që Rrugën e Arbrit, ne do ta ndërtojmë dhe do fillojë përpara zgjedhjeve të ardhshme. E kam takuar ambasadoren kineze më shumë se ambasadorin Lu për reformën në drejtësi. Dje ja thashë, s’mbaj dot më. Kur do e fillojmë punën? O e fillojmë bashkë, o unë do e filloj edhe pa ju”, tha Rama.”, deklaroi ai.
 
Rama kritikoi qëndrimin e Partisë Demokratike pas shpalljes së rezultatit.

“Si ka mundësi që një parti t’i kthehet dhe të akuzojë një popull të tërë si bagëti që dalin nga parcela e hashashit dhe jo njerëz dhe shqiptarë që morën një vendim? Si ka mundësi që partia më e madhe e opozitës të arrijë deri në këtë pikë pasi e shpall me të madhe një test kombëtar një fushatë vendore, pasi premton që nga këtu do të fillojë një përmbysje e madhe në shqipëri, edhe pasi madje shpall fitoren në momentin kur mbyllen kutitë e votimit?! Pasi sheh që nga numërimi merr vetëm ‘opingën e Sheros’, u turret dibranëve për t’i akuzuar si bashkëpunëtorë në krim. Është fyer i gjithë komuniteti juaj dhe tradita juaj e çmuar”, deklaroi Rama.

Nga ana e tij, kryebashkiaku i sapozgjedhur, Muharem Rama tha se fitorja e thellë i shton më shumë përgjegjësi.

“Rezultati më shton përgjegjësitë dhe më shtyn edhe më fort që ta bëjmë Dibrën ashtu siç e meriton. Gjatë fushatës më kanë thënë trafikant e gjëra të tila, unë vetëm kam shëruar dibranët, plagët e Dibrës”, deklaroi ai.

Mitingun falenderues kryeministri Rama e mbylli me batuta në adresë të opozitës.

“Të flasësh për PD sot është njësoj si të flasësh për një kalë që nuk tërheq dot karrocën e vet. Ndjesë kalit se është kafshë fisnike…”, tha ai.

Në takim marrin pjesë deputetë dhe drejtues të tjerë të Partisë Socialiste që u angazhuan në fushatën për zgjedhje vendore për këtë bashki.

Top Channel