F1, zyrtarizohet kalendari i vitit 2016
03/12/2015 10:55
Guardiola: Fëmija i tretë ndoshta e bën Foden të kuptojë, nuk luhet gjithmonë me “marshin e gjashtë” 26/04 23:29
Botërori i Formulës 1 në vitin 2016 do të nisë në datën 20 mars në Melburn. Federata Ndërkombëtare e Automobilizmit (FIA) zyrtarizoi kalendarin e këtij kampionati, duke konfirmuar edhe afrimin e datës së nisjes së tij. Sezoni i ri i këtij kampionati do të ketë një rekord, pasi në kalendar janë 21 gara, ndërkohë që deri në këtë moment, sipas rregullores, lejohej vetëm zhvillimi i 20 garave çdo vit.
FIA e bëri të ditur kalendarin e ri nëpërmjet një komunikate për shtyp, ku ndër të tjera theksohej se ekziston edhe problemi i Çmimit të Madh të Austin. Kjo garë është parashikuar të zhvillohet në 23 tetorin e vitit të ardhshëm, por vështirësitë financiare të cirkuitit kanë ngritur jo pak dilema për të.
E reja më interesante për sezonin e ri të Formulës 1 është përfshirja në kalendar e Çmimit të Madh të Azerbajxhanit, që do të zhvillohet në 19 qershor. Për t’u theksuar është se organizatorët e kësaj gare kanë nënshkruar me drejtuesit e Formulës 1 një kontratë 10-vjeçare. Gjithashtu, të bie në sy rikthimi në Botëror i garës së Gjermanisë që këtë vit mungoi për shkak të problemeve ekonomike si të pistës së Hokenhajmit, ashtu dhe asaj të Nurburgringut.
Botërori i Formulës 1 i vitit 2016 do të mbyllet me Çmimin e Madh të Abu Dabit, në 27 nëntor.
Top Channel
