Serbia: Luajmë për fitore

“Shqipëria është një ekip me eksperiencë dhe ne do ta analizojmë situatën. Ka mundur dhe Portugalinë, por të dyja ndeshjet e ardhshme janë të rëndësishme për ne”, tha Branislav Ivanoviç, kapiten i Serbisë.

Federata Serbe e Futbollit ka mbledhur ekipin e saj për të bërë përgatitjet para ndeshjes me Armeninë, në qendrën e tyre në Stara Pazova, ndërsa tri ditë më vonë do të presë miqtë nga Shqipëria. Serbët kanë kërkuar që tifozët shqiptarë të marrin pjesë duke dhënë listat me të dhënat e tyre, pasi thonë se është procedurë e zakonshme. Kjo ende nuk është zgjidhur.

Mediat serbe kanë interesim për ndeshjen me Shqipërinë, ndonëse duket se dinë shumë pak për kombëtaren shqiptare.

Lazar Markoviç, futbollist i Liverpoolit, tha se do të japin maksimumin, ndërsa nuk pati shumë fjalë për vlerësimin e kombëtares.

“Nuk i njoh. E di që njëri nga ta është në Bazel, kemi luajtur kundër tyre”, tha Lazar Markoviç, futbollist i kombëtares serbe.

TCH: Çfarë pritjesh keni?

Markoviç: Natyrisht, ne do të luajmë për fitore.

Ndeshjen Serbi-Shqipëri do ta ruajnë tre deri në katër mijë policë.

“Federata Serbe e Futbollit ende nuk ka një përgjigje nëse tifozët shqiptarë do të vijnë në Beograd për të parë ndeshjen Serbi-Shqipëri, megjithatë ata kanë premtuar një organizim të mirë, ndonëse thonë se pjesa e sigurisë nuk u takon atyre”, informon korrespondenti i TCH në Serbi, Idro Seferi.

Top Channel