Bislimi: Serbia kërkon që strukturat ilegale të financohen deri në krijimin e Asociacionit 25/04 18:48
Një trup i pajetë është gjetur mbrëmjen e së mërkurës në fshatin Zahaq të Pejës. Rastin e ka konfirmuar policia dhe prokuroria e Pejës.
Sipas informacioneve të para bëhet fjalë se viktima është ish-pjesëtari i Ushtrisë Çlirimtare të Kosovës, Qerim Kelmendi.
Policia tha se rreth orës 01:27 është informuar se në këtë fshat, në një rrugë është duke u djegur një veturë. Me të marrë informacionin, njësitë e Stacionit Policor në Pejë kanë shkuar në vendngjarje, ku kanë vërejtur një veturë që ishte përfshirë tërësisht nga zjarri.
Në vendin e ngjarjes kanë arritur njësitë e zjarrfikësve, të cilët e kanë shuar në tërësi zjarrin. Gjatë kohës derisa zjarrfikësit ishin duke lokalizuar zjarrin në brendësi të veturës është vërejtur një person mashkull, trup i karbonizuar.
Vendit të ngjarjes i janë përgjigjur njësitë relevante të sektorit rajonal të hetimeve, njësiti K9, si dhe prokurori i shtetit dhe ekipi mjekësor, të cilët kanë konstatuar vdekjen e viktimës.
Gjatë kqyrjes së vendit të ngjarjes është konstatuar se vetura e djegur është e tipit VW Passat me targa vendore.
Sektori Rajonal i Hetimeve pranë Drejtorisë Rajonale të Policisë në Pejë, ne bashkëpunim të plotë me prokurorin e shtetit janë duke u marrë të gjitha veprimet hetimore për të sqaruar rrethanat e këtij rasti të cilësuar ‘vrasje’ dhe janë duke u bërë përpjekje maksimale për të identifikuar kryesin ose kryesit e mundshëm.
Top Channel
