‘Në Athinë do ta kemi të vështirë’. Kështu u shpreh trajneri i Realit të Madridit, Jose Mourinho në prag të sfidës me AEK dhe në fakt kështu ndodhi. Los Blancos arritën të fitojnë këtë përballje me rezultatin 3-2 vetëm në çastet e fundit në një sfidë ku dy herë u panë në disavantazh dhe ku la gjurmën e tij edhe mbrojtësi i kombëtares shqiptare, Stavro Pilo.
Fillimi i ndeshjes ishte mjaft i mirë për AEK të Athinës, me skuadrën greke që në minutën e 12 mori avantazhin me golin e Koita pas një kundërsulmi të shpejtë. Në minutën e 28 Bellingham shënoi për Realin e Madridit, por goli i anglezit u anulua për pozicion jashtë loje. Megjithatë nuk vonoi shumë dhe Reali i Madridit barazoi vërtet shifrat në 1-1 dhe ishte sërish Bellingham ai që shënoi për Los Blancos. Dhe me këtë rezultat skuadrat shkuan në pushimin e ndeshjes.
Në pjesën e dytë Reali i Madridit me Mbappe dhe AEK me Koita patën shanset e tyre për të shënuar por pa sukses, ndërkohë që disa momente Pilo rezultoi vendimtar për AEK duke e shpëtuar skuadrën nga pësimi i golit. E megjithatë ishte pikërisht mbrojtësi i kombëtares shqiptare ai që ndëshkoi Los Blancos në minutën e 75 duke i dhënë avantazhin 2-1 AEK të Athinës. Një avantazh që gjithsesi zgjati vetëm 3 minuta pasi Reali i Madridit barazoi shifrat në 2-2 me Kylian Mbappe. Kur u duk se sfida po shkonte drejt barazimit, skuadra madrilene shënoi golin e tretë në minutat shtesë me Federico Valverde për të fituar këtë ndeshje 3-2 dhe për t’u ngjitur në kuotën e 12 pikëve po aq sa edhe PSG.
Top Channel
