Beteja për kujdestarinë e djalit/ Olivier Martinez fiton ndaj Halle Berry-t, aktorja nuk mund ta mbajë gjatë natës

Një gjykatë në Los Angeles vendosi që Martinez të mbajë kujdestarinë fizike të fëmijës, ndërsa Berry nuk do të ketë të drejtë ta mbajë atë gjatë natës për momentin.

Pas shpalljes së vendimit, aktori 60-vjeçar u shpreh se shpreson që marrëdhënia mes djalit dhe nënës së tij të përmirësohet në të ardhmen, duke theksuar se nuk dëshiron që Maceo të krijojë ndjenja urrejtjeje ndaj saj.

“Shpresoj vërtet që Maceo dhe nëna e tij të kenë një marrëdhënie më të mirë në të ardhmen. Nuk dua që djali im ta urrejë nënën e tij. Dua që ai ta dojë, ta falë dhe në një moment të mund të pajtohen”, tha Martinez për emisionin “Extra”.

Përplasja e fundit ligjore mes dy aktorëve nisi në fillim të tetorit, kur Martinez akuzoi ish-bashkëshorten se kishte ushtruar dhunë fizike ndaj djalit të tyre gjatë një incidenti më 26 shtator. Sipas pretendimeve të tij, Berry e kishte sulmuar dhe e kishte kapur fëmijën për fyti. Aktorja i ka mohuar kategorikisht këto akuza.

Halle Berry’s ex Olivier Martinez hopes their son Maceo can have a ‘better relationship’ with his mother… after French actor scored custody war win https://t.co/f1YOXGE8kI

— Daily Mail Celebrity (@DailyMailCeleb) October 30, 2026

Fillimisht, Martinez arriti të siguronte një urdhër të përkohshëm kufizues ndaj Berry-t, në emër të tij dhe të djalit. Megjithatë, gjykata më pas vendosi ta anulonte këtë urdhër dhe hodhi poshtë edhe kërkesën për një urdhër kufizues të bazuar në dhunën në familje.

Sipas vendimit të fundit, Martinez do të ketë kujdestarinë kryesore fizike të Maceos, ndërsa Berry do të ruajë kujdestarinë e përbashkët ligjore. Kjo do të thotë se aktorja do të vazhdojë të ketë të drejtë të marrë pjesë në vendimmarrjen për çështjet që lidhen me të birin, madje do të ketë fjalën vendimtare në rast mosmarrëveshjesh mes prindërve për çështje të caktuara.

Gjithashtu, Berry është e detyruar të marrë pjesë në seanca këshillimi për të përmirësuar marrëdhënien me djalin e saj.

Nga ana tjetër, aktorja e ka akuzuar Martinez për ndërhyrje të vazhdueshme në çështjet që lidhen me edukimin dhe mbështetjen psikologjike të Maceos, duke pretenduar se ai po pengon përpjekjet e saj si nënë.

Në dokumentet e paraqitura në gjykatë, Berry ka deklaruar se ish-bashkëshorti po e përfshin djalin në konfliktin mes tyre. Ajo ka ngritur gjithashtu shqetësimin për përkeqësimin e sjelljes së 13-vjeçarit në shkollë, duke iu referuar raporteve që flasin për mungesë disipline dhe probleme në marrëdhëniet me shokët e klasës dhe mësuesit.

Berry kishte kërkuar kujdestarinë e vetme ligjore për vendimet që lidhen me edukimin, shëndetin dhe mbështetjen psikologjike të djalit, si dhe një program njëvjeçar terapie për të dhe fëmijën. Ajo kishte propozuar gjithashtu që komunikimi mes prindërve të bëhej vetëm përmes aplikacionit “Our Family Wizard”, me qëllim shmangien e konflikteve të mëtejshme.

Avokatja e aktores, Marina Beck, u shpreh se klientja e saj është e kënaqur me anulimin e urdhrit të përkohshëm kufizues dhe se do të vijojë të përqendrohet te mirëqenia e familjes së saj.

Halle Berry dhe Olivier Martinez u martuan në vitin 2013 dhe u ndanë në vitin 2016, ndërsa divorci i tyre u finalizua në vitin 2023. Megjithatë, mosmarrëveshjet për rritjen dhe kujdestarinë e djalit të tyre të vetëm vijojnë, ndërsa gjykata pritet ta shqyrtojë sërish çështjen në muajin nëntor.

Top Channel