“Doja të tregoja se isha vajzë e mirë”, Natalie Portman rrëfen presionin që përjetoi që në moshë të vogël

Në një intervistë për revistën Harper’s Bazaar, aktorja foli për përvojat e saj të para në Hollywood dhe presionin që ndjeu teksa ndërtonte karrierën në një moshë shumë të re.

Portman e nisi rrugëtimin e saj në kinematografi me role në filma si “Léon: The Professional”, ku luajti në moshën 12-vjeçare, si dhe në “Heat” dhe “Beautiful Girls”. Ajo shpjegoi se, ndërsa personazhet që interpretonte krijonin një imazh të caktuar për të, u përpoq, së bashku me prindërit e saj, të vendoste një kufi të qartë mes roleve në ekran dhe identitetit të saj në jetën reale.

“Mendoj se pati një përpjekje të vetëdijshme, sepse po portretizohesha si një Lolita e seksualizuar, për të treguar se: ‘Jo, jam serioze, jam një vajzë e mirë, jam modeste, jam e zgjuar, jam studente’. I theksova ato pothuajse si një mekanizëm mbrojtës”, u shpreh aktorja.

Natalie Portman says being sexualized as a child star forced her to become a ‘good girl’ as protection https://t.co/n9gSnozwf3 https://t.co/INhJHilXkp

— Page Six (@PageSix) October 27, 2026

Për të shmangur identifikimin me imazhin provokues që lidhej me disa prej roleve të saj të hershme, Portman zgjodhi të vishej në mënyrë më konservatore në publik dhe të vinte në plan të parë arsimimin e saj.

Me kalimin e viteve, aktorja kuptoi se imazhi që kishte ndërtuar për të mbrojtur veten kishte krijuar një tjetër keqkuptim, shumë njerëz e konsideronin një person tepër serioz.

“Megjithatë, me kalimin e kohës, arrita të kuptoj se të gjithë mendojnë se jam vërtet shumë serioze”, tha ajo.

Portman theksoi se, në të vërtetë, është një person që i pëlqen të qeshë dhe të bëjë gjëra spontane, larg perceptimit të perfeksionistes që mund të ketë krijuar publiku, veçanërisht pas rolit të saj në filmin “Black Swan” (“Mjellma e Zezë”).

“Jam shumë e gëzuar, më pëlqen të qesh më shumë se çdo gjë tjetër dhe më pëlqen të bëj gjëra pa kuptim. Mendoj se njerëzit gjithmonë mendojnë se jam perfeksioniste për shkak të ‘Mjellmës së Zezë’. Unë jam krejt e kundërta. Jam e sjellshme me veten”, shpjegoi aktorja.

Ajo kujtoi gjithashtu një shprehje që përdornin gjatë viteve të kolegjit: “E plotë, jo perfekte”, duke nënvizuar rëndësinë e pranimit të vetvetes pa u përpjekur vazhdimisht për të arritur përsosmërinë.

“Kontributi më i madh i një artisti është të ofrojë gëzim”

Duke folur për fazën aktuale të jetës dhe karrierës së saj, Portman tha se gëzimi është bërë një nga elementet më të rëndësishme për të, si në jetën personale, ashtu edhe në punën e saj artistike.

Aktorja u shpreh se, në një kohë kur njerëzit përballen vazhdimisht me lajme dhe ngjarje të vështira, arti mund të luajë një rol të rëndësishëm duke u dhënë atyre momente lehtësimi dhe lumturie.

“Çdo epokë ka momentet e saj të errëta, por ndiej se po ndodhin shumë gjëra vërtet të vështira. Është vazhdimisht para syve tanë, dhe kështu mendoj se kontributi më i madh që një artist mund të japë tani është të ofrojë pak gëzim”, përfundoi Natalie Portman.

Top Channel