Java e 7-të e Kategorisë së Parë ka nisur me dy përballje interesante, ku nuk kanë munguar golat dhe zhvillimet që ndikojnë në garën për ngjitjen në elitën e futbollit shqiptar.
Bylisi dhe Pogradeci kanë ndarë nga një pikë në përballjen direkte, e cila përfundoi me rezultatin 2-2. Një sfidë me përmbysje dhe katër gola, ku asnjëra prej skuadrave nuk arriti të sigurojë fitoren.
Ballshiotët kaluan të parët në avantazh me Nyanguilën në minutën e 12-të, por miqtë reaguan me shpejtësi. Kazim realizoi dy herë, në minutat 26 dhe 42, duke përmbysur rezultatin në favor të Pogradecit.
Megjithatë, në shtesën e pjesës së parë, Stoilov u tregua i saktë nga pika e bardhë e penalltisë, duke rikthyer baraspeshën në 2-2.
Në pjesën e dytë, të dyja skuadrat kërkuan golin e fitores, por rrjetat mbetën të paprekura. Bylisi u detyrua të luante me një lojtar më pak nga minuta e 82-të, pas daljes me karton të kuq të Adeduros.
Në fund, rezultati mbeti 2-2, duke mos ndryshuar diferencën prej dy pikësh mes dy skuadrave që synojnë ngjitjen direkte në Superiore.
Flamurtari ka marrë një fitore të rëndësishme ndaj Besëlidhjes, duke triumfuar me rezultatin minimal 1-0. Skuadra vlonjate e zgjidhi ndeshjen që në minutat e para, falë golit të Salës në minutën e 8-të.
Kjo fitore vjen në një moment pozitiv për Flamurtarin, që po regjistron rezultate të mira dhe synon të afrohet më shumë me kreun e renditjes.
Nga ana tjetër, Besëlidhja u paraqit në këtë takim me Mirel Josën në pankinë, i cili mori drejtimin e skuadrës për vijimin e sezonit. Pavarësisht ndryshimit në stol, lezhjanët nuk arritën të shmangnin humbjen.
REZULTATET:
Bylis 2-2 Pogradeci
12’ Nyanguila, 45+2’ Stoilov (P) / 26’, 42’ Kazim
Flamurtari 1-0 Besëlidhja
8’ Sala
Top Channel
