Një ndeshje që dukej e fituar për Romën u kthye në një makth në minutat e fundit.
Skuadra italiane ishte në avantazh 3-1 ndaj Real Madridit, por madrilenët reaguan në mënyrë spektakolare dhe përmbysën gjithçka, duke triumfuar 4-3 në “Olimpico”, në duelin e raundit të dytë të Champions League. Roma e nisi takimin me presion të lartë, duke vënë në vështirësi skuadrën madrilene. Megjithatë, në minutën e 15-të, Gasperini u detyrua të bënte një zëvendësim të hershëm, pasi Koné pësoi një dëmtim dhe u largua nga fusha mes lotësh. Në vend të tij hyri Pisilli.
Pesë minuta më vonë, vendasit kaluan në avantazh falë një goditjeje nga distanca të de Roon, e cila u devijua lehtë dhe përfundoi në rrjetë, duke mposhtur Courtois. Përgjigjja e Realit ishte e shpejtë: në minutën e 25-të, Mbappé shfrytëzoi asistin e Diomandé dhe barazoi shifrat, me topin që u devijua edhe nga Mancini.
Pjesa e parë u mbyll në barazim, por pas pushimit Roma u rikthye më e vendosur. Një gabim i Vinicius në minutën e 51-të i dha mundësinë Morës të shërbente për Malen, i cili riktheu avantazhin e vendasve. Vetëm gjashtë minuta më vonë, sulmuesi holandez goditi sërish, këtë herë pas një pasimi të shkëlqyer nga Soulé, duke çuar rezultatin në 3-1. Tifozët e Romës nisën të besonin te një fitore e madhe, por Reali nuk kishte thënë fjalën e fundit. Në minutën e 83-të, Espí ngushtoi diferencën, ndërsa dy minuta më vonë Endrick barazoi rezultatin në 3-3, pas një goditjeje nga këndi.
Kur ndeshja po i drejtohej fundit, madrilenët plotësuan përmbysjen e jashtëzakonshme. Në minutën e 90-të, Antonio Rüdiger përfitoi sërish nga një goditje këndi dhe shënoi golin e fitores, duke lënë Romën të zhgënjyer pas një ndeshjeje që dukej se e kishte në kontroll. Kështu, Reali mori tri pikë të rëndësishme në transfertë dhe shkoi në kuotën e gjashtë pikëve, ndërsa Roma mbetet me vetëm një pikë pas dy ndeshjeve.
Top Channel
