“Po e vendosin njerëzimin në rrugën e shkatërrimit”, Rusia sulmon SHBA-në pasi pranoi se ka sisteme armësh në hapësirë 15/09 22:40
Skema e ngjyrave
Madhësia e shkrimit
Në kontrast me deklaratat e përsëritura të presidentit amerikan Donald Trump se Shtetet e Bashkuara nuk përballen me mungesë municionesh, një raport i ri i inspektorit të përgjithshëm të Departamentit të Mbrojtjes dokumenton mungesa serioze në rezervat strategjike të ushtrisë amerikane dhe vështirësi në rimbushjen e tyre.
Sipas raportit, Forcat e Armatosura të SHBA-së shpenzuan më shumë se 22 miliardë dollarë për municione nga shkurti deri në qershor, duke shkaktuar një “mungesë të stoqeve strategjike”.
Raporti, i cili përbën një nga vlerësimet e rralla të pavarura mbi gjendjen e arsenalit amerikan, thekson gjithashtu se ekzistojnë “pengesa në bazën industriale”, të cilat e bëjnë të vështirë rimbushjen e shpejtë të municioneve.
Gjatë luftës me Iranin, forcat amerikane përdorën sasi të mëdha armësh me rreze të gjatë veprimi, si dhe sisteme të mbrojtjes ajrore dhe raketore për të penguar sulmet iraniane.
Një analizë e Qendrës për Studime Strategjike dhe Ndërkombëtare në fund të korrikut kishte evidentuar një rënie të konsiderueshme të rezervave të disa raketave kritike interceptuese, përfshirë sistemet Patriot dhe THAAD. Në disa raste, stoqet e disponueshme kishin rënë me më shumë se 50%.
Raporti i ri nuk jep shifra për sasinë e armëve që kanë mbetur në arsenalet amerikane, por konfirmon se rezervat janë reduktuar dhe se ekzistojnë probleme serioze me ritmin e prodhimit dhe rimbushjes.
Pentagoni po përpiqet tashmë të përshpejtojë proceset e prokurimit dhe prodhimit, me synimin për të mbushur boshllëqet në arsenale dhe për të ruajtur aftësinë për t’iu përgjigjur shpejt një krize të re.
Donald Trump dhe administrata e tij kanë hedhur vazhdimisht poshtë raportet se rezervat amerikane të municioneve janë varfëruar ose kanë arritur në nivele të rrezikshme.
Më 4 gusht, Sekretari i Mbrojtjes Pete Hegseth i cilësoi këto raportime si “të pavërteta”.
Më 3 shtator, Trump deklaroi përmes Truth Social se SHBA-të kanë sasi “pothuajse të pakufizuara” municionesh, duke shtuar se vendi vijon të grumbullojë rezerva dhe të përgatitet “për çdo eventualitet”.
Megjithatë, raporti i inspektorit të përgjithshëm paraqet një situatë dukshëm më shqetësuese, veçanërisht sa i përket aftësisë për të zëvendësuar shpejt municionet e përdorura.
Sipas raportit, humbjet e pajisjeve ushtarake gjatë konfliktit kanë arritur në 3.7 miliardë dollarë, ndërsa 7.4 miliardë dollarë të tjera lidhen me shpenzime të tjera të luftës.
Në total, SHBA-të shpenzuan 33.4 miliardë dollarë për luftën nga 28 shkurti deri më 30 qershor.
Në mesin e pajisjeve të humbura janë katër avionë luftarakë F-15E, një avion luftarak F-35 Joint Strike Fighter dhe 30 mjete ajrore pa pilot MQ-9, të cilat sipas raportit u shkatërruan në “rrethana të ndryshme”.
Në fillim të konfliktit, Trump kishte deklaruar vazhdimisht se lufta do të përfundonte brenda pak javësh. Megjithatë, së fundmi ai ka lënë të kuptohet se konflikti mund të vazhdojë deri “menjëherë pas” zgjedhjeve të mesit të mandatit në SHBA, që zhvillohen në nëntor.
Ndërkohë, sondazhet tregojnë se lufta mbetet jopopullore në mesin e amerikanëve.
Një sondazh i Reuters/Ipsos i publikuar në fillim të shtatorit tregoi se vetëm 23% e amerikanëve besojnë se Shtetet e Bashkuara janë në një pozicion më të fortë për t’u përballur me Iranin sesa ishin para fillimit të luftës. Edhe mes republikanëve, kjo shifër është rreth 50%.
Raporti i inspektorit të përgjithshëm ka rikthyer kështu debatin mbi koston reale të luftës, jo vetëm në aspektin financiar, por edhe për sa i përket gatishmërisë së ushtrisë amerikane, ndërsa Shtëpia e Bardhë vijon të këmbëngulë se rezervat e SHBA-së mbeten të mjaftueshme.
Top Channel
