“Odisea” e Nolan pushton Greqinë/ Shtatë në 10 e vlerësojnë pozitivisht, debat për Helenën e Trojës

Sipas një sondazhi të ri të kompanisë Kapa Research, 71% e atyre që e kanë parë filmin e vlerësojnë atë shumë ose mjaft pozitivisht, ndërsa shumica dërrmuese beson se produksioni do të ndihmojë edhe në promovimin ndërkombëtar të Greqisë.

Rreth 90% e grekëve thonë se kanë dëgjuar ose dinë diçka për filmin, ndërsa 48% janë përfshirë tashmë në diskutime rreth tij.

Një rol të rëndësishëm në interesin e publikut ka luajtur edhe emri i Christopher Nolan. Popullariteti i regjisorit britanik arrin në 64% në publik dhe në 90% mes atyre që e kanë parë filmin në kinema.

Gjithashtu ,nga ata që e kanë parë filmin “Odisea”, 71% japin një vlerësim pozitiv. Efektet vizuale morën vlerësimin më të lartë, me 86%, ndërsa interpretimet e Matt Damon dhe Anne Hathaway u vlerësuan pozitivisht nga 85% e publikut. Regjia mori 81% vlerësime pozitive. Më kritike janë opinionet për mënyrën se si është përshtatur vetë epopeja homerike, e cila mori vetëm 48% vlerësime pozitive.

Një nga rezultatet më të rëndësishme të sondazhit lidhet me ndikimin që filmi pritet të ketë për imazhin dhe turizmin e Greqisë. 79% e atyre që e kanë parë filmin besojnë se ai përbën një promovim të rëndësishëm të vendit jashtë kufijve, ndërsa 75% mendojnë se do të ndihmojë në rritjen e turizmit.

Po ashtu, 72% besojnë se filmi i afron brezat e rinj me letërsinë e lashtë greke. “Odisea” duket se ka rikthyer edhe Homerin në diskutimet familjare. 36% e të anketuarve thanë se pas filmit kanë diskutuar në familje për veprën e Homerit, ndërsa 31% kanë bërë krahasime mes filmit dhe teksteve origjinale.

Një nga çështjet që ka shkaktuar më shumë diskutim është zgjedhja e Lupita Nyong’o për rolin e Helenës së Trojës. Në opinionin e përgjithshëm, qëndrimet janë të ndara në mënyrë të barabartë: 46% e shohin zgjedhjen pozitivisht ose në mënyrë neutrale, ndërsa 46% shprehen negativisht.

Megjithatë, mes atyre që e kanë parë filmin, pranimi i kësaj zgjedhjeje rritet në 62%. Sondazhi tregon gjithashtu se 57% e të pyeturve janë të hapur ndaj interpretimeve më të lira të historisë dhe mitologjisë së lashtë.

Por publiku mbetet i ndarë kur pyetet nëse liria artistike duhet të ketë përparësi ndaj besnikërisë ndaj tekstit origjinal: 40% mbështesin lirinë e krijuesit, ndërsa 39% preferojnë një përshtatje më besnike ndaj veprës së Homerit.

Sondazhi i Kapa Research u zhvillua nga 31 korriku deri më 2 gusht 2026, me 1.575 persona në 13 rajonet e Greqisë. Në kampion përfshiheshin edhe 238 persona që e kishin parë filmin.

Top Channel