FIFA ka bërë një hap pas lidhur me projektin e saj ambicioz “FIFA Forward Enterprise” (FFE), por ende nuk e ka tërhequr zyrtarisht planin. Institucioni më i lartë i futbollit botëror ka zbutur qëndrimin, duke garantuar se iniciativa nuk do të zbatohet pa miratimin e federatave anëtare.
Gjithçka nisi më 28 korrik, kur u zbulua se FIFA po shqyrtonte krijimin e “FIFA Forward Enterprise”, një subjekt komercial me vlerë rreth 20 miliardë dollarë. Projekti parashikonte që investitorë privatë, mes tyre edhe firma e Joshua Kushner, vëllait të Jared Kushner, të blinin një paketë minoritare prej 20-21% të të drejtave tregtare të Kupës së Botës dhe Kupës së Botës për Klube.
Plani shkaktoi reagime të forta. UEFA ishte konfederata që reagoi më ashpër, ndërsa të 55 federatat anëtare të saj vendosën më 30 korrik një bojkot të pacaktuar ndaj të gjitha garave të FIFA-s. Mes tyre janë edhe Spanja dhe Portugalia, dy nga vendet organizatore të Kupës së Botës 2030. Edhe konfederatat CONCACAF dhe AFC (Azia) shprehën shqetësime të mëdha, duke kritikuar mungesën e konsultimeve dhe afatin shumë të shkurtër deri më 19 shtator për të marrë një vendim mbi një çështje kaq të rëndësishme.
Presioni u rrit edhe më tej pas dorëheqjes së Carlos Cordeiro, një prej këshilltarëve më të afërt të presidentit Gianni Infantino, i cili u largua në shenjë proteste. Nën këtë klimë tensioni, më 31 korrik FIFA publikoi një deklaratë zyrtare, ku sqaroi se aktivitetet e saj tregtare do të mbeten të pandryshuara dhe se “FIFA Forward Enterprise” nuk do të krijohet nëse nuk miratohet nga të 211 federatat anëtare. Në të njëjtën deklaratë, FIFA theksoi se “askush nuk po shet futbollin” dhe akuzoi një pjesë të mediave për raportime të pasakta mbi projektin.
Në praktikë, ky konsiderohet një tërheqje e pjesshme e FIFA-s përballë presionit të federatave dhe konfederatave, por jo një braktisje përfundimtare e planit. Procesi i konsultimeve vazhdon dhe vendimi final pritet të merret në votimin e planifikuar për muajin shtator.
Top Channel
