Jared Leto akuzohet nga katër gra për abuzime seksuale, dokumentari i ri flet për sulmet dhe takimet e tyre me aktorin

Akuzat janë bërë publike në dokumentarin e ri të BBC-së, “Jared Leto: Sekreti i Errët i Hollivudit”, që transmetohet të mërkurën, më 29 korrik. Njëra nga gratë pretendon se Leto e sulmoi seksualisht në banjën e një moteli kur ajo ishte 17 vjeç, ndërsa një tjetër thotë se aktori e kërcënoi se do ta sulmonte seksualisht kur ajo ishte 19 vjeç.

Një grua e tretë deklaron se ka kryer marrëdhënie seksuale me Leton në Kaliforni kur ishte 17 vjeç, një rast që, sipas dokumentarit, mund të klasifikohet si joshje e një të mitureje, pasi mosha e pëlqimit në shtetin e Kalifornisë është 18 vjeç.

Jared Leto Accused of Criminal Sexual Conduct by Four Women in BBC Documentary https://t.co/xicfE0VPxH

— Variety (@Variety) July 29, 2026

Ndërkohë, një grua e katërt pretendon se aktori i ka bërë telefonata të përsëritura me përmbajtje sugjestive seksuale kur ajo ishte 16 vjeç dhe i kishte propozuar të kryenin marrëdhënie seksuale.

BBC bën të ditur se ka parë edhe një marrëveshje konfidencialiteti (NDA), të cilën gruas së katërt iu kërkua ta nënshkruante për të mos folur për marrëdhënien e saj me Leton, por ajo refuzoi.

Në dokumentar flasin edhe katër gra të tjera, të cilat e akuzojnë Leton se u ka bërë telefonata “të çuditshme dhe shpesh me përmbajtje seksuale eksplicite” kur ato ishin më të reja. Sipas pretendimeve të tyre, këto telefonata janë zhvilluar mes viteve 2002 dhe 2016, kur aktori ishte në të 30-at dhe 40-at e tij.

Sipas BBC-së, disa prej dëshmive janë verifikuar përmes miqve dhe familjarëve të grave, të cilët kishin dijeni për ngjarjet që në fillim. Në disa raste, ekzistojnë edhe fotografi dhe mesazhe që, sipas dokumentarit, mbështesin pretendimet e tyre.

Dy burra që kanë punuar me grupin muzikor të Letos, Thirty Seconds to Mars, shfaqen gjithashtu në dokumentar dhe pretendojnë se stafi ndihej i pakëndshëm me mënyrën se si ai ndërvepronte me vajza adoleshente. Sipas tyre, aktori i ftonte herë pas here pas skene, në dhomën e zhveshjes ose në shtëpinë ku zhvilloheshin regjistrimet.

Në total, dhjetë gra rrëfejnë në dokumentar për ndërveprimet dhe takimet e tyre me Jared Leton, ndërsa nëntë prej tyre flasin publikisht për herë të parë.

Publikimi i dokumentarit vjen një vit pasi Leto u akuzua për sulm seksual nga DJ Allie, e cila pretendoi se ai e sulmoi seksualisht dhe e traumatizoi psikologjikisht kur ajo ishte 17 vjeç. Pas atyre akuzave, gra të tjera ngritën pretendime të ngjashme ndaj aktorit.

Top Channel