Finalja mes Argjentinës dhe Spanjës nuk është vetëm beteja për trofeun më të rëndësishëm të futbollit.
Është një ndeshje që ka mbledhur aq shumë rekorde sa mund të hyjë në histori edhe përpara se të nisë. Në qendër të vëmendjes është dueli mes Lionel Messit dhe Lamine Yamal. Dy futbollistë të ndarë nga 20 vjet e 19 ditë, diferenca më e madhe e moshës mes dy titullarëve kundërshtarë në një finale të Kupës së Botës. Njëri përfaqëson një epokë që po mbyllet, tjetri një epokë që sapo ka nisur.
Messi dhe Yamal, përballja e dy brezave
Për Messin kjo do të jetë finalja e tretë e Botërorit, pas atyre të vitit 2014 dhe 2022. Argjentinasi do të bëhet vetëm futbollisti i dytë në histori që luan në tre finale të Kupës së Botës, duke iu bashkuar brazilianit Cafu.
Në krahun tjetër, vetëm 19 vjeç, Lamine Yamal vazhdon të thyejë rekorde. Ai është futbollisti i parë që luan si adoleshent si në finalen e Europianit, ashtu edhe në finalen e Botërorit. Së bashku me Pau Cubarsín, ai bëhet gjithashtu adoleshenti i katërt dhe i pestë që nisin një finale të Kupës së Botës si titullarë. Një detaj interesant është se tre adoleshentët e mëparshëm – Pelé në 1958, Giuseppe Bergomi në 1982 dhe Kylian Mbappé në 2018 – e fituan trofeun.
Statistikat që premtojnë spektakël
Messi dhe Yamal nuk ndajnë vetëm skenën, por edhe kreun e një tjetër statistike. Argjentinasi është futbollisti me më shumë driblime të suksesshme në këtë Botëror, plot 25, ndërsa Yamal renditet i dyti me 22. Askush tjetër nuk ka arritur të kalojë kufirin e 20 driblimeve.
Ndërkohë Messi mban ende gjallë edhe garën për “Këpucën e Artë”. Me tetë gola të shënuar, ai ndodhet vetëm dy realizime pas Kylian Mbappé, i cili kryeson me dhjetë. Francezi, së bashku me Geoff Hurst, mbetet gjithashtu një nga vetëm dy futbollistët që kanë realizuar “hat-trick” në një finale Botërori.
Argjentina kundër Spanjës, përballja e rekordeve
Edhe statistikat e skuadrave janë mbresëlënëse. Argjentina ka saktësinë më të lartë të pasimeve në turne, 90.5%, një shifër që në 60 vitet e fundit është tejkaluar vetëm nga vetë Spanja në Botërorët e 2018 dhe 2022. Kampionët e Amerikës së Jugut kanë shënuar gjithashtu tetë gola nga minuta e 76-të deri në fund të ndeshjeve, rekord i barabartë me Gjermaninë e vitit 1954.
Nga ana tjetër, Spanja mbërrin në finale pa qenë asnjëherë në disavantazh gjatë gjithë turneut. Nëse triumfon, do të bëhet vetëm kombëtarja e katërt në histori që fiton Kupën e Botës pa qenë asnjë minutë në humbje.
Një statistikë e fundit mund të rezultojë vendimtare: në gjashtë nga shtatë finalet e fundit të Botërorit, skuadra që ka shënuar e para ka ngritur edhe trofeun. Tani mbetet të shihet nëse historia do të përsëritet, apo finalja më e mbushur me rekorde e viteve të fundit do të prodhojë një tjetër kapitull të papritur.
Top Channel
