Raporti: Lojtaret e tenisit u përballën me mbi 12 mijë postime abuzive në rrjetet sociale gjatë vitit 2025

Raporti tregon se niveli i abuzimit mbeti pothuajse i njëjtë me atë të vitit 2024, ndërsa një pjesë e konsiderueshme e përmbajtjes së dëmshme u identifikua dhe u neutralizua.

Sipas të dhënave të Shërbimit të Matricës së Kërcënimeve të Signify, i cili përdor inteligjencën artificiale të mbështetur nga analistë njerëzorë për monitorimin e platformave si X, Instagram, Facebook, TikTok dhe YouTube, 66% e rasteve të abuzimit serioz u eliminuan. Gjithashtu, 35 llogari të lidhura me 12 persona u raportuan pranë autoriteteve ligjzbatuese.

Shoqata e Tenisit të Grave (WTA) e cilësoi situatën si të papranueshme, duke theksuar se edhe pse abuzimi vjen nga një numër relativisht i vogël llogarish, ndikimi i tij mbi lojtaret mund të jetë i rëndë.

Raporti evidenton se bastvënësit e irrituar vazhdojnë të jenë burimi kryesor i abuzimit në internet. Ata ishin përgjegjës për 42% të rasteve të verifikuara të abuzimit gjatë vitit 2025 dhe për 59% të rasteve më serioze. Një vit më parë, ata përbënin 48% të postimeve abuzive të identifikuara.

Bordi i lojtareve të WTA-së vlerësoi progresin e arritur në identifikimin dhe trajtimin e përmbajtjes abuzive, duke theksuar se bashkëpunimi ndërmjet organizatave të tenisit dhe partnerëve të tyre ka ndihmuar në mbështetjen e sportisteve dhe në marrjen e masave ndaj autorëve të këtyre sulmeve.

WTA dhe World Tennis theksuan se lufta kundër abuzimit në internet kërkon veprim të përbashkët nga platformat e mediave sociale, autoritetet ligjzbatuese, organet drejtuese të sportit dhe industria e basteve sportive. Sipas tyre, vetëm përmes një bashkëpunimi të tillë mund të arrihet mbrojtje më efektive për sportistet dhe ndëshkim për autorët.

Debati mbi sigurinë e sportistëve në internet është intensifikuar pas rasteve të fundit të kërcënimeve. Tenistja britanike Katie Boulter deklaroi gjatë vitit 2025 se kishte marrë kërcënime me vdekje në rrjetet sociale, ndërsa disa lojtarë kërkuan vendosjen e verifikimit të detyrueshëm të identitetit në platformat sociale për të kufizuar abuzimet anonime.

Ndërkohë, edhe tenisi i meshkujve po përdor teknologji të reja për të luftuar fenomenin. Një sistem i bazuar në inteligjencën artificiale ka bllokuar rreth 162,000 postime abuzive gjatë një viti, duke treguar se përdorimi i teknologjisë po luan një rol gjithnjë e më të rëndësishëm në mbrojtjen e sportistëve nga sulmet në internet.

Top Channel