Belgjika ka marrë një goditje të rëndë gjatë çerekfinales së Kupës së Botës 2026 ndaj Spanjës, pasi portieri Thibaut Courtois u detyrua të largohej nga fusha i dëmtuar.
Në minutën e 70-të, gardiani i Real Madridit kërkoi zëvendësim dhe u largua mes lotësh, një skenë që ngriti menjëherë shqetësim te stafi teknik dhe tifozët belgë. Ende nuk dihet natyra e saktë e dëmtimit, ndërsa ekipi mjekësor nuk ka dhënë një komunikim zyrtar mbi gjendjen e 33-vjeçarit.
Në vend të Courtois hyri portieri i Manchester United, Senne Lammens, i cili mori menjëherë përgjegjësinë për të mbrojtur portën e “Djajve të Kuq” në momentin më kritik të ndeshjes.
Në çastin e dëmtimit, rezultati ishte 1-1. Spanja kishte kaluar në avantazh me Fabián Ruiz, ndërsa Belgjika ishte kundërpërgjigjur me golin e Charles De Ketelaere. Dëmtimi i Courtois mund të jetë një goditje e rëndë jo vetëm për Belgjikën në këtë Botëror, por edhe për Real Madridin, në pritje të ekzaminimeve mjekësore që do të përcaktojnë shkallën e dëmtimit.
Top Channel
