Pavarësisht polemikave, Princi Harry pret vendimin e gjykatës gjatë vizitës së tij në Mbretërinë e Bashkuar

Duka i Sussex do të marrë pjesë në aktivitete të organizuara nga Lojërat Invictus, fondacioni i tij për mbështetjen e veteranëve të plagosur ushtarakë. Gjatë javës ai do të vizitojë edhe Birminghamin, qytetin që do të presë edicionin e ardhshëm të Lojërave Invictus.

Vizita e princit zhvillohet pa bashkëshorten e tij, Meghan, dhe fëmijët e tyre, Archie dhe Lilibet, të cilët nuk e kanë shoqëruar në Londër për shkak të shqetësimeve që lidhen me sigurinë.

Mbërritja e Harry-t u shoqërua edhe me një keqkuptim lidhur me akomodimin. Ekipi i tij njoftoi se ishte pranuar një ftesë për të qëndruar në Pallatin Buckingham, por Pallati e mohoi këtë, duke sqaruar se princit i ishte bërë e ditur paraprakisht se nuk mund të strehohej aty, pasi nuk kishte konfirmuar pjesëmarrjen brenda afatit të caktuar.

Padia që pritet të marrë vendim është ngritur nga Princi Harry së bashku me disa figura të njohura publike, përfshirë Elton John, Simon Hughes, Elizabeth Hurley, Sadie Frost dhe baroneshën Doreen Lawrence.

Ata pretendojnë se Associated Newspapers ka përdorur metoda të paligjshme për të siguruar informacione që më pas janë publikuar në artikujt e gazetave. Botuesi i ka mohuar kategorikisht këto akuza.

Ky proces gjyqësor konsiderohet të jetë një nga betejat e fundit ligjore të Princit Harry kundër mediave britanike, të cilat ai i ka akuzuar vazhdimisht për praktika të padrejta dhe ndërhyrje në jetën e tij private. Nëse gjykata pranon vetëm një pjesë të pretendimeve dhe rrëzon të tjerat, pritet që të dyja palët ta interpretojnë vendimin si fitore.

Top Channel