Flavio Bolsonaro nga Miami falenderon Trumpin dhe sfidon Lulën: Jam presidenti i vërtetë i zgjedhur i Brazilit

Në një letër të hapur, të shpërndarë për gazetarët nga aleatët e tij pas mbërritjes në Miami së bashku me familjen, Bolsonaro pretendoi se është “presidenti i vërtetë i zgjedhur i Brazilit”, pavarësisht humbjes në raundin e dytë të zgjedhjeve presidenciale.

Senatori i krahut të djathtë falënderoi presidentin amerikan Donald Trump dhe qytetarët amerikanë për mikpritjen, ndërsa shprehu mirënjohjen edhe për presidentin argjentinas Javier Milei, i cili, sipas raportimeve, e ndihmoi të largohej nga Brazili drejt Shteteve të Bashkuara.

Në letrën e tij, Bolsonaro pretendoi se në Brazil po zhvillohet një “fushatë persekutimi të motivuar politikisht”, me qëllim mbajtjen e tij peng. Ai akuzoi kundërshtarët e tij për vjedhjen e zgjedhjeve, por nuk paraqiti prova që të mbështesnin pretendimet për mashtrim elektoral.

“Dua t’u them jo vetëm 60 milionë votuesve të mi, por edhe popullit brazilian, se unë jam presidenti i zgjedhur dhe se kriminelët që vodhën zgjedhjet braziliane janë pjesë e një organizate kriminale që ka vendosur një tirani”, deklaroi ai.

Bolsonaro argumentoi se vendimi për t’u larguar nga Brazili ishte pasojë e, sipas tij, politizimit të sistemit gjyqësor. Ai këmbënguli se nuk ishte larguar për t’u fshehur, por për t’u shndërruar në “udhëheqësin që meriton populli im”.

Ai njoftoi gjithashtu se synon të udhëheqë opozitën nga Shtetet e Bashkuara, duke refuzuar të pranojë humbjen përballë Luiz Inácio Lula da Silvës dhe duke lënë të hapur mundësinë e përpjekjeve për të përmbysur rezultatin zgjedhor.

Hetimi në Brazil dhe largimi drejt SHBA-së

Largimi i Bolsonaros nga Brazili vjen në një kohë kur Gjykata Supreme e vendit kishte urdhëruar dorëzimin e pasaportave të tij në policinë federale, në kuadër të një hetimi për dyshime për pastrim parash, akuza të cilat ai i mohon.

Me largimin drejt Floridës, ai ndoqi gjurmët e babait të tij, ish-presidentit Jair Bolsonaro, i cili gjithashtu u zhvendos në këtë shtet amerikan pasi humbi zgjedhjet presidenciale të vitit 2022 kundër Lulës.

Pasi qëndroi larg vëmendjes publike për gati një ditë, Flavio Bolsonaro u shfaq sërish të martën në mbrëmje në Argjentinë. Prej andej, ai udhëtoi përmes Ekuadorit drejt Miamit, ku mbërriti të mërkurën në mëngjes me avionin privat të një biznesmeni argjentinas.

Deklaratat e tij nga Shtetet e Bashkuara sinjalizojnë se Bolsonaro synon ta zhvendosë përplasjen politike me Lulën përtej kufijve të Brazilit, duke e kthyer qëndrimin në SHBA në një pikë mbështetjeje për opozitën e tij.

Top Channel