Për t’u siguruar që asnjë nxënës nuk do ta humbiste emocionin e ndeshjes së 1/8-ave të Kupës së Botës mes Anglisë dhe Meksikës, shkolla fillore “Linthorpe” ndërmori një nismë të veçantë.
Në vend që t’i linin fëmijët të qëndronin zgjuar deri në orët e vona të natës, drejtuesit e shkollës vendosën ta transmetonin ndeshjen në sallën e asambleve, pasi e kishin mbajtur rezultatin sekret. Starti fillestar, i cili ishte parashikuar për në orën 01:00 pas mesnate (me orën e Britanisë), u cilësua nga drejtoresha Grace Mitchell si “shumë vonë” për moshën e nxënësve.
“Turne si ky janë një mundësi fantastike për ta bërë bashkë komunitetin tonë shkollor dhe për të festuar diversitetin që na karakterizon,” u shpreh ajo.
Nxënësit dhe stafi iu bashkuan festës të veshur me fanellat e tyre të preferuara, duke e kthyer sallën në një tribunë të vërtetë tifozësh. Për Scarlet, një nga nxënëset, kjo ishte mundësia e parë për të ndjekur Anglinë në këtë Botëror, ndërsa Henry, një tifoz i apasionuar që i kishte ndjekur të gjitha ndeshjet, u shpreh entuziast: “Salla është mbushur me dekorime dhe madje edhe mësuesit kanë ardhur me banderola; ndihet një atmosferë shumë angleze këtu!”
Në mesazhin e tyre për ekipin, nxënësit u treguan mbështetës. Scarlet, e cila idhull ka kapitenin Harry Kane, porositi: “Jepni më të mirën tuaj dhe, edhe nëse nuk fitoni, ne do të jemi sërish krenarë.” Ndërsa Henry, adhurues i Declan Rice, shtoi: “Edhe nëse humbisni, keni arritur shumë deri këtu.”
Top Channel
