Mesazhe të publikuara nga një grup në aplikacionin Telegram, ku komunikojnë persona të përfshirë në organizimin e protestës, tregojnë se zhvendosja e protestuesve drejt Komisariatit nr. 3 ishte diskutuar paraprakisht.
Sipas bisedave të publikuara, pjesëmarrësit shkëmbejnë mendime për mënyrën se si turma duhet të drejtohej drejt komisariatit, ku mbaheshin 21 personat e arrestuar pas protestës së 2 korrikut para Kuvendit.
Në një prej mesazheve shkruhet: “Po te 302. Sot mendoj me e përdor turmën si duhet, me ik te 302 i nxjerrim çunat direkt”, ndërsa në një tjetër propozohet: “Ose bllokojmë rrugë, ose hyjmë sot se jemi mijëra”. Me “302” i referohen IEVP ku mbahen të paraburgosurit në rrugën “Mine Peza”.
Megjithatë, në grup ka pasur edhe mesazhe që u bënin thirrje protestuesve të shmangnin dhunën. Në një njoftim të fiksuar thuhet: “Shiko disa sot janë me maska në protestë, distancohuni nga veprime dhune”. Një tjetër pjesëmarrës shkruan: “Edhe me dhunë nuk fitojmë gjë”.
Nga ana tjetër, disa mesazhe kërkonin rritjen e presionit ndaj institucioneve, përmes bllokimit të rrugëve ose veprimeve më të forta gjatë protestës.
Publikimi i këtyre bisedave vjen pas incidenteve të së premtes mbrëma para Komisariatit nr. 3, ku një grup protestuesish shkatërruan hyrjen dhe ambientet e godinës dhe tentuan të hynin brenda. Policia ndërhyri për shpërndarjen e turmës, ndërsa gjatë përplasjeve mbeti elënduar edhe një efektive.
Mesazhet kanë ngritur dyshime se marshimi drejt komisariatit nuk ishte një lëvizje spontane, por ishte diskutuar dhe e koordinuar më herët përmes grupeve të komunikimit të protestës.
Top Channel
