Shumë trajnerë pas eliminimit të skuadrave të tyre respektive kanë dhënë dorëheqjen apo janë shkarkuar, por te Australia është marrë një vendim krejt tjetër. Federata Australiane e Futbollit vendosi të konfirmojë besimin te Tony Popovic.
Trajneri 53 vjeçar u vu në shenjestër të kritikave për disa vendime që kontribuan në humbjen me penallti ndaj Egjiptit në 1/16 të finaleve të Botërorit. Një mes këtyre vendimeve ishte ai i zëvendësimit të portierit titullar Patrick Beach me Mathew Ryan, me këtë të fundit që nuk bëri asnjë pritje në serinë e gjuajtjes së penalltive. Po kështu ai ngarkoi të ekzekutojë një penallti, 19 vjeçarit Harrington që e gaboi gjuajtjen e tij.
‘Çdo tifoz ka idenë e tij se çfarë do të mund të bënte më mirë, por Popovic dhe stafi i tij, janë gjithnjë në pozicionin më të mirë për të vlerësuar atë që duhet. Pastaj, sot të gjithë dinë gjithçka, por për ne trajneri meriton besim të plotë, është personi i duhur për të vijuar punën’-tha Shefi Ezkekutiv i Federatës Australiane të Futbollit, Martin Kugeler.
Popovic, që e mori drejtimin e Australisë në 2024, e drejtoi këtë skuadër në pjesëmarrjen e 6 radhazi në Kupën e Botës dhe përpara turneut ai kishte rinovuar kontratën deri në Kupën e Azisë të 2027 që do të mbahet në Arabinë Saudite në muajin janar të vitit të ardhshëm.
Top Channel
