Një nga momentet më të bukura të këtij Botërori ndodhi jashtë stadiumit në Miami, pikërisht para sfidës mes Argjentinës dhe Kepit të Gjelbër.
Gazetari brazilian i “TV Globo”, Nilson Klava, po pyeste tifozët për parashikimet e ndeshjes, pa e ditur se po intervistonte José Pedro Dias—babanë e portierit hero të turneut, Vozinha. Pasi tifozi parashikoi me bindje se Kepi i Gjelbër do të kualifikohej me penallti, gazetari e pyeti nëse besonte vërtet se Vozinha mund të bënte mrekullinë. Përgjigja e tij ishte epike: “Unë besoj që do ta bëjë. Edhe ai vetë është i bindur. Unë jam babai i tij!”
I shtangur, gazetari e pyeti i buzëqeshur: “Po tallesh?!”. Dias iu përgjigj me një qetësi absolute: “Nuk bëj shaka. Kur them diçka, e them me bindje. I gjithë Kepi i Gjelbër është krenar për të, por unë jam njeriu më krenar në botë.”
Heroi 40-vjeçar i Botërorit Vozinha është padyshim sensacioni i Kupës së Botës 2026. Portieri veteran i udhëhoqi debutuesit në fazën eliminatore dhe bëri një paraqitje heroike edhe në humbjen 3-2 (pas shtesës) kundër kampionëve të Argjentinës. Sot, 40-vjeçari ka rrëmbyer zemrat e të gjithëve dhe numëron një shifër të çmendur prej mbi 19 milionë ndjekësish në rrjetet sociale.
Top Channel
