Nga: Endi Tufa
Përtej golave, kartonëve dhe emocioneve, një nga protagonistët më të heshtur, por thelbësorë të këtij Botërori 2026, ka qenë trupa gjykuese. Në një analizë ekskluzive për Top Channel, Sokol Jareci, një figurë autoritare në këtë fushë, vlerëson se ky turne po spikat për një nivel të lartë profesionalizmi, ku gabimet dhe ndërhyrjet e VAR-it kanë qenë të kontrolluara, duke treguar se arbitrat janë në lartësinë e sfidave.
Rritja e standardeve dhe “Faktori Penso” Sipas Jarecit, ky Botëror po sjell risi pozitive, me performancën e arbritres Tori Penso, e cila ka treguar personalitet të lartë në të dyja ndeshjet që ka gjykuar. “Diferencën vazhdojnë ta bëjnë arbitrat e UEFA-s dhe ata nga vendet me kualitet të lartë futbolli si Argjentina, Brazili, Meksika, apo edhe nga USA dhe Australia, e cila përfaqësohet denjësisht nga arbitri iranian Alireza Faghani,” shpjegon Jareci. Kjo cilësi pritet të jetë edhe më e dukshme në rundet e ardhshme, ku pesha e vendimeve do të rritet.
Rasti Iran-Egjipt: Pse goli i minutës 93 ishte “jashtë loje”? Një nga momentet më të debatuara të këtij Botërori ishte anulimi i golit të Iranit ndaj Egjiptit në minutat shtesë. Sokol Jareci, duke u mbështetur në ekspertizën e tij si ish-arbitër ndërkombëtar, qartëson mekanizmin teknik që çoi në atë vendim: “Debati për rastin konkret lindi sepse në shumicën e rasteve mbrojtësi i fundit është portieri, ndërsa këtu ishte një lojtar,” shpjegon Jareci. “Sipas Ligjit 11 të IFAB, një lojtar është në pozicion jashtë loje nëse është më afër vijës fundore se mbrojtësi i parafundit. Në rastin Iran-Egjipt, portieri kishte dalë nga porta, duke u shndërruar në një lojtar të parëndësishëm për llogaritjen e offside-it. Mbrojtësi i fundit ishte Ibrahim, ndërsa mbrojtësi i parafundit ishte Abdelkarim. VAR konstatoi se këmba e lojtarit iranian ishte margjinalisht prapa Abdelkarim-it.”
Jareci sqaron se teknologjia semi-automatike (kamera që gjurmojnë 29 pika të trupit 50 herë në sekondë) nuk le vend për interpretime emocionale. “Mjafton maja e këpucës të jetë disa milimetra më përpara, dhe rregullorja është e prerë: është jashtë loje.”
Mesazhi për futbollin Për Jarecin, ky Botëror është një shkollë e vërtetë. “Fakti që loja po rrjedh pa ndërprerje të gjata dhe se vendimet teknike po zbatohen me precizion, dëshmon se futbolli po evoluon drejt një drejtësie të bazuar në teknologji, por të menaxhuar nga arbitra me integritet,” përfundon ai.
Background Profesional i Ekspertit: Sokol Jareci është një emër i njohur në futbollin shqiptar dhe atë ndërkombëtar. Me një karrierë 10-vjeçare si arbitër ndërkombëtar i FIFA-s, ai ka gjykuar në nivelet më të larta, duke fituar një eksperiencë të pasur që e përdor sot në detyrën e tij si Shef i Departamentit të Arbitrimit në Federatën Shqiptare të Futbollit (FSHF). Mendimi i tij për çështjet e arbitrimit në Botëror përfaqëson zërin më autoritar në Shqipëri.
Top Channel
