Gjasat janë shumë të pakta që Paolo Maldini të jetë drejtori i ri teknik i kombëtares italiane të futbollit.
Giovanni Malagò, presidenti i ri i FIGC, kishte shprehur dëshirën ta kishte atë në rolin e drejtorit teknik, por lajmet e fundit tregojnë se një nga lojtarët më të mëdhenj të historisë së futbollit nuk do të ribashkohet me fanellën “Azzurra”.
Një histori e ndërprerë Karriera e Paolo Maldinit si lojtar me kombëtaren italiane u mbyll më 18 qershor 2002, ditën kur Italia u eliminua nga Kupa e Botës në Kore dhe Japoni. Pavarësisht se vazhdoi të luante për klubin e tij deri në vitin 2009, të gjitha përpjekjet për ta kthyer atë në kombëtare ishin të kota. Marcello Lippi u përpoq ta bindte për Botërorin 2006, por Maldini, duke treguar dinjitet dhe korrektësi morale, refuzoi. Ai nuk e konsideronte të drejtë të merrte vendin e një lojtari tjetër pas një cikli kualifikues ku nuk kishte marrë pjesë. Ironia e fatit e deshi që Italia të fitonte Botërorin pikërisht një vit pasi ai u largua nga kombëtarja.
Një lidhje që vjen nga larg Historia e familjes Maldini me kombëtaren italiane nisi më 6 janar 1960 me Cesare Maldinin. Kur “Paolino” erdhi në jetë në vitin 1968, lidhja mes familjes dhe kombëtares ishte tashmë shumë e fortë. Në vitin 1986, Cesare, asokohe trajner i U-21, i dha mundësinë Paolos të debutonte, ndërsa në vitin 1988, Azeglio Vicini e thirri atë në kombëtaren e madhe. Pjesa tjetër është histori: Paolo Maldini mbeti titullar i padiskutueshëm për 14 vite, duke qenë protagonist në evenimente të mëdha si Italia ’90, Pasadena ’94, dhe Europiani i vitit 1996.
Top Channel
