Nëse mendonit se arritja e kuotës së 18 golave dhe rrëzimi i legjendës Miroslav Klose ishte e vetmja mrekulli që Lionel Messi bëri ndaj Austrisë, e keni gabim.
Me dopietën e fundit, Messi arrin në kuotën e pesë golave në këtë edicion, pas tripletës spektakolare ndaj Algjerisë në debutim.
Me këtë performancë, ai konfirmohet i pari lojtar që shënon në gjashtë edicione të ndryshme të Kupës së Botës, një rekord që e ndan tashmë vetëm me Cristiano Ronaldon. Rrugëtimi i tij është një epope që nisi në vitin 2006, kur vetëm 18 vjeç shënonte ndaj Serbi-Malit të Zi, për të vazhduar me 4 gola në Brazil 2014, 1 gol në Rusi 2018 dhe plot 7 rrjeta në triumfin e Katarit. Statistikat janë marramendëse: 122 gola me fanellën e “Albiceleste” në 201 ndeshje. Përtej shifrave, ndeshja me Austrinë theu tabu të reja: Messi u bë lojtari më i vjetër që shënon dopietë në një Botëror, por edhe ai me më shumë penallti të ekzekutuara e të humbura në historinë e turneut.
Mes gjenialitetit dhe gabimeve njerëzore, “Pleshti” po shkruan kapitullin e fundit të një karriere galaktike. Argjentina fluturon, dhe me një Messi që duket se nuk plaket kurrë, ëndrra për titullin mbetet më gjallë se kurrë.
Top Channel
