Marcelo Bielsa është nga ata persona që nuk ka frikë të thotë opinionin e tij. Trajneri i Uruguajit është shumë kritik me çdo aspekt të Kupës së Botës që nuk e bindin dhe këtu përfshihet edhe pauza e hidratimit.
Skuadra e tij në ndeshjen me Arabinë Saudite e ndjeu këtë pasi kjo pauzë erdhi në momentin më të mirë të saj teksa po kërkonte përmbysjen në rezultat. Në konferencën e tij për shtyp, Bielsa foli për shumë tema, por më shumë u përqendrua pikërisht te risia e pauzave prej 3 minutash në secilën prej 2 pjesëve.
‘Të luash në 4 pjesë në vend të 2, ndryshon konceptin dhe kulturën që është ndërtuar për të interpretuar futbollin-tha Bielsa-Ky ndryshim nuk shton asgjë dhe heq shumë gjëra. Kur ndeshjet u ndanë në 4 pjesë nuk u mendua për efektin që do të kishte mbi atë që e bëri futbollin të jetë një sport që të bën për vete. U mendua për të tjera pasoja’
Në orët e mëparshme, një studim i publikuar konfirmoi se pauzat e hidratimit kanë ndikuar në mënyrë të drejtpërdrejtë në rezultatin e 80% të ndeshjeve të zhvilluara deri tani. Efekti i frenimit të skuadrave vazhdimisht në sulm dhe i dhënies së frymëmarrjes për skuadrat në vështirësi, bëri që futbolli të jetë më statik gjatë zhvillimit të ndeshjes.
‘Përpara këtij vendimi, futbolli kishte një karakteristikë dhe tani ka një tjetër-shtoi Bielsa-njerëzit e duan këtë sport për karakteristikat e tij. Ka gjëra shumë të sakta si VAR dhe këtë duhet ta duartrokasim. Konkluzionet për këtë çështje nuk janë vetëm të miat, është diçka qe po e dëgjoj dhe unë jam dakord me këtë çështje’.
Top Channel
