Mbretërit e luksit sportiv, stadiumi që kushton 50% më shumë se çdo ndërtim tjetër në planet

Nga arenat moderne me teknologji të fjalës së fundit deri te projektet faraonike që tejkalojnë buxhetet e disa shteteve, bota e sportit (veçanërisht në SHBA) nuk njeh limite.

Ja se si paraqitet klasifikimi i stadiumeve më të shtrenjta në planet:

1. Mbreti i padiskutueshëm: SoFi Stadium

I komisionuar nga familja miliardere Kroenke, SoFi Stadium në Los Angeles qëndron i vetëm në majë dhe në një kategori krejtësisht të tijën. Me një kosto përfundimtare prej $5.5 miliardë, kjo arenë ka vendosur një standard të paparë në histori. Është pothuajse 50% më e shtrenjtë se çdo stadium tjetër i ndërtuar ndonjëherë, duke u kthyer në simbolin absolut të luksit sportiv.

2. Lufta për vendin e dytë: Ekzistues vs. Në planifikim

Për pozicionin e dytë, situata është disi e ndërlikuar dhe varet nëse llogarisim projektet në letër apo ato që tashmë presin tifozë:

• ⁠ ⁠Projekti i së ardhmes: Sipas të dhënave, stadiumi i dytë më i shtrenjtë në botë është New Stadium at RFK Campus në Washington D.C., shtëpia e re e Washington Commanders. Kostoja e tij e planifikuar kap shifrën e $3.8 miliardë, por ky mbetet ende një vizion në letër, pasi ndërtimi pritet të nisë në vitin 2027 dhe të hapë dyert në 2030.
• ⁠ ⁠Kampioni ekzistues: Nëse flasim për stadiume funksionale, vendi i dytë i takon ikonikut Yankee Stadium në New York. I hapur në vitin 2009, ai kushtoi $2.3 miliardë në atë kohë, një shifër që po të përshtatet me inflacionin dhe vlerën e vitit 2025, shkon në plot $3.45 miliardë.

3. Pjesa tjetër e podiumit

Për të plotësuar listën e gjigantëve, menjëherë pas tyre renditet Allegiant Stadium në Las Vegas. Kjo arenë e zezë dhe super moderne u ndërtua me një kosto mbresëlënëse prej $1.9 miliardë.

Krahasimi i çmendur: SoFi vs. Bota

Për të kuptuar vërtet përmasat e çmendura të SoFi Stadium, mjafton të bëjmë një krahasim me disa nga arenat më të njohura ndërkombëtare. Ndërkohë që stadiumi në Los Angeles kaloi 5.5 miliardë dollarët:

• ⁠ ⁠Juventus Stadium në Torino, një nga impiantet më modernë dhe të suksesshëm në Evropë, ka kushtuar “vetëm” 155 milionë euro.
• ⁠ ⁠Edhe stadiumi i parë i ndërtuar nga e para në Katar për Kupën e Botës 2022 kushtoi rreth 515 milionë euro, një thërrime në krahasim me “përbindëshin” amerikan.

Diferencat tregojnë qartë se kur bëhet fjalë për investime në infrastrukturën e sportit, elita amerikane po luan në një ligë pa asnjë rival.

Top Channel