Monza rikthehet në Serie A! Fininvest uron dhe jep lajmin e papritur: “Kujtuam Berlusconin, tani po ikim…”

Edhe pse pësuan një humbje 2-0 në ndeshjen e kthimit në shtëpi kundër Catanzaros së Alberto Aquilanit (gola nga Jack 39′ dhe Frosinini 78′), djemtë e trajnerit Bianco arritën të festojnë. Ndeshja e parë kishte përfunduar 2-0 në favor të Monzas, duke e çuar rezultatin e përgjithshëm agregate në barazim 2-2, por brianzolët u promovuan në elitë falë renditjes më të mirë në kampionatin e rregullt (ku përfunduan në vendin e tretë). Monza i bashkohet kështu Venezias dhe Frosinones si skuadrat e reja të rreshtuara në Serie A.

Ky sukses i madh ka sjellë edhe një reagim zyrtar e mjaft rëndësishëm nga kompania holding e familjes Berlusconi, Fininvest. Përmes një komunikate, Fininvest e quajti këtë arritje si “mënyrën më të bukur për të kujtuar këmbënguljen dhe energjinë me të cilën Silvio Berlusconi kultivoi ëndrrën e tij të fundit të madhe sportive”.

Së bashku me urimet për ekipin dhe tifozët, erdhi edhe njoftimi historik: duke filluar nga data 30 qershor, Fininvest do të përfundojë plotësisht rrugëtimin e saj si aksionere e klubit të Monzas, duke u larguar me krenari dhe me vetëdijen se kontribuoi në shkrimin e një faqeje të veçantë në futbollin italian.

Top Channel