Në orët e para të së shtunës, një 41-vjeçar shqiptar u përfshi në shkëmbim zjarri me policinë greke në zonën e Mikrolimano, Athinë.
Ngjarja ndodhi rreth orës 05:30, kur efektivët e stacionit të Pireut tentuan ta kontrollonin atë jashtë një dyqani.
Shtetasi, i identifikuar si Alesio Xhelo, i njohur në Greqi si “Titi”, u përpoq të arratisej dhe qëlloi me armë një efektiv policie. Policët reaguan menjëherë, duke përdorur armët e shërbimit dhe plagosën Xhelon, i cili u transportua në spitalin “Attikon”. Në vendin e ngjarjes u sekuestruan 3 armë zjarri dhe 6 granata.
Xhelo është nga Fieri dhe ka një histori kriminale të rëndë. Ai ka qenë i shpallur në kërkim në Greqi për vrasje, rrëmbim personi dhe shkëmbime zjarri me policinë, dhe më parë kishte qëndruar në arrest shtëpie në Fier nën mbikëqyrjen e FNSH.
Ai kishte arratisur nga burgu i Petro Ralli në Greqi në 2019, duke marrë peng një gardian, dhe ishte i dënuar me burgim të përjetshëm për vrasje. Pas arratisjes, u kap në Vlorë me një armë pa leje dhe i ishte vendosur arrest shtëpie në Fier.
Ngjarja tregon rrezikshmërinë e personave me precedent të lartë kriminal dhe sfidat në kontrollin e tyre ndërkufitar. Policia greke po vazhdon hetimet për rrethanat e incidentit.
Dyshohet se pavarësisht akuzave të rënda, drejtësia shqiptare e kishte lënë të lirë atë pasi në platformën TikTok në 24 tetor të vitit 2025, Alesio Xhelo ka publikuar një video duke dalë nga një Komisariat shqiptar policie e duke u përqafuar me familjarë, ndërsa me pas shfaqet në mjedise të ndryshme në qytetin e Sarandës.
Dyshohet se në muajt e parë të këtij viti para se të kalonte ilegalisht kufirin për Greqi, pasi aty ishte person i shumëkërkuar, Alesio Xhelo qarkullonte në qytetin e Sarandë ku edhe strehohej.
Top Channel
