LIVE/ “Një qytetërim i tërë do të vdesë sonte”, orët e fundit të afatit të SHBA për Iranin. Trump kërcënon, përgjigjet Teherani: Sulmet do shtrihen përtej Lindjes së Mesme

Të hënën, Donald Trump kërcënoi me “shkatërrim të plotë” të infrastrukturës iraniane, duke paralajmëruar se SHBA mund ta godasë Iranin “brenda një nate”.  “Një qytetërim i tërë do të vdesë sonte, nëse nuk ka marrëveshje”-ishte kërcënimi i Trump.

Trump i ka dhënë Iranit një afat deri në orën 20:00 EDT të së martës (00:00 GMT / 01:00 BST të mërkurën) për të rihapur Ngushticën e Hormuzit. Por afatet e tij kanë ndryshuar edhe më parë.

Ndërkohë, Irani thotë se ka refuzuar zyrtarisht një propozim të SHBA për armëpushim, raportojnë mediat shtetërore – duke publikuar njëkohësisht një listë kërkesash. Forcat e Gardës Revolucionare deklaruan në televizionin shtetëror se sulmet e tyre hakmarrëse do të shtrihen përtej Lindjes së Mesme nëse SHBA-ja shkel vijat e kuqe të Teheranit.

20:20 “Një qytetërim i tërë do të vdesë sonte”/ Pas deklaratës së Trump, ‘shpërthejnë’ demokratët: Ta largojmë si President

Presidenti i SHBA-së, Donald Trump, paralajmëroi këtë mëngjes se “një qytetërim i tërë do të vdesë sonte”, ndërsa afrohet afati i vendosur prej tij në orën 20:00 (me kohën lindore) për Iranin që të hapë Ngushtica e Hormuzit. Pas këtyre deklaratave, shumë ligjvënësish demokratë në Kongres kanë bërë thirrje për aktivizimin e Amendamenti i 25-të, i cili lejon largimin e presidentit nga detyra nëse ai konsiderohet i papërshtatshëm për të ushtruar funksionin.

20:06 “Një qytetërim i tërë do të shkatërrohet”/ Shtëpia e Bardhë komenton deklaratën e Trump: Vetëm ai e di çfarë do i bëjë Iranit

Shtëpia e Bardhë deklaroi se Presidenti amerikan, Donald Trump, është “i vetmi” që e di se çfarë do të bëjë lidhur me situatën në Iran. Deklarata vjen pas komenteve të Trump dhe të zëvendëspresidentit J.D. Vance, duke lënë pak detaje për publikun dhe mediat.

18:58 Sulmet izraelite ndaj Hezbollahut në Liban, mbi 1500 viktima dhe 4800 të plagosur në 5 javë

Sulmet izraelite në Liban kanë vrarë 1,530 persona që nga fillimi i luftës midis Hezbollahut të mbështetur nga Irani dhe Izraelit më 2 mars, tha Ministria e Shëndetësisë të martën. Numri përfshin 102 gra, 130 fëmijë dhe 57 personel mjekësor të vrarë dhe 4,812 të plagosur që nga përshkallëzimi i fundit që filloi pesë javë më parë.

17:12 “Kemi mjete të tjera nëse Irani nuk ndryshon sjelljen”/ Deklarata e J.D. Vance, Shtëpia e Bardhë mohon mundësinë e përdorimit të armëve bërthamore

Pas interpretimit të komenteve të J.D. Vance në Hungari, Shtëpia e Bardhë mohon çdo sugjerim se po konsideron përdorimin e armëve bërthamore ndaj Iranit. Zëvendëspresidenti Vance deklaroi: “Jam i bindur se do të marrim një përgjigje, pozitive ose negative, deri në orën 20:00 të mbrëmjes së sotme lidhur me ultimatumin ndaj Teheranit”.

10:52 Përfundon alarmi, rihapet ura që lidh Arabinë Saudite me Bahreinin

Është rihapur lidhja e vetme rrugore mes Arabisë Saudite dhe Bahreinit, pasi ishte mbyllur përkohësisht për arsye sigurie gjatë sulmeve ajrore iraniane.

10:51 Izraeli godet fabrikën iraniane që prodhon materiale për raketa balistike, shpërthime edhe në Teheran

Ushtria izraelite tha se kishte goditur një tjetër strukturë petrokimike në Iran të hënën në mbrëmje, duke thënë se ishte “një nga të paktat struktura të mbetura” që përdoren për të prodhuar materiale për raketa balistike.

 10:20 The Times: Mojtaba Khamenei në gjendje të rëndë shëndetësore, pikëpyetje për drejtimin e Iranit

Udhëheqësi suprem i Iranit, Mojtaba Khamenei, raportohet se ndodhet në gjendje të rëndë shëndetësore dhe i paaftë për të ushtruar detyrat e tij, sipas një memoje diplomatike të cituar nga The Times.

 11:32 Sulme me dronë gjatë natës në Liban, të paktën tetë të vrarë

Në Liban, të paktën tetë persona u vranë në sulme ajrore dhe me dronë gjatë natës, raporton Agjencia Kombëtare e Lajmeve (NNA) e vendit.

 11:25 Thirrje për mobilizim në Iran, presidenti Pezeshkian: 14 mln iranianë janë gati të sakrifikojnë jetën e tyre

Presidenti i Iran, Masoud Pezeshkian, ka deklaruar se mbi 14 milionë iranianë janë shprehur të gatshëm të sakrifikojnë jetën në mbrojtje të vendit, në rast të një pushtimi tokësor nga SHBA ose Izraeli.

10:01 Kriza në Ngushticën e Hormuzit, drejtori i Agjencisë Ndërkombëtare të Energjisë: Më serioze se vitet 1973, 1979 dhe 2002 së bashku

Kriza aktuale energjetike, e shkaktuar nga bllokada e Ngushticës së Hormuzit nga Irani, është më e rrezikshme se çdo krizë e mëparshme, tha Fatih Birol, drejtori i Agjencisë Ndërkombëtare të Energjisë (IEA), në një intervistë për gazetën Le Figaro.

08:26 Sulmi ajror iranian në bazën ushtarake të Kuvajtit, pesëmbëdhjetë amerikanë u plagosën

Agjencia amerikane e lajmeve CBS raportoi se “15 amerikanë” u plagosën në një sulm me dron iranian në bazën ajrore Ali Al Salem në Kuvajt gjatë natës, duke cituar dy zyrtarë amerikanë.

 08:10 Ushtria izraelite paralajmëron qytetarët në Iran: Mos përdorni trenat, jeni të rrezikuar

Ushtria izraelite u bëri thirrje qytetarëve në Iran të shmangin udhëtimin me tren dhe qëndrimin pranë linjave hekurudhore, duke paralajmëruar për rrezik të drejtpërdrejtë për jetën e tyre.

07:36 Irani i kundërpërgjigjet Donald Trumpit: Kërcënimet për shkatërrim brenda natës janë “iluzionuese” dhe “arrogante”

Forcat e armatosura të Iranit i’u përgjigjën deklaratave kërcënuese të presidentit amerikan Donald Trump, duke i cilësuar ato si “retorikë arrogante” dhe “kërcënime të pabaza”, ndërsa tensionet mes dy vendeve vijojnë të përshkallëzohen.

07:23 Donald Trump kërcënon Iranin me bombardime masive: Mund ta shtypim brenda një nate

Presidenti amerikan Donald Trump paralajmëroi Iranin për një përshkallëzim të menjëhershëm ushtarak, duke deklaruar se SHBA mund ta “shtypë” vendin brenda një nate, nëse nuk ka një marrëveshje për paqe.

Top Channel