SPAK po heton ende ndaj grupit kriminal që ekzekutoi Gilmando Danin dhe Muçi Shaljanin, ndërkohë që prokuroria e kryeqytetit, e cila kreu veprimet paraprake hetimore, i ka dorëzuar gjykatës dy ish-zyrtarë që dyshohen se shkelën detyrën gjatë punësimit në AMP të viktimës së dytë, Shaljani.
Siç njoftoi Prokuroria e Përgjithshme, ish-drejtori i Përgjithshëm i komanduar i Agjencisë së Mbikëqyrjes Policore, Artiol Saliasi, dhe ish-shefi i shërbimeve mbështetëse, Gëzim Sala, dyshohen se punësuan në mënyrë të paligjshme shoqëruesin e Gilmando Danit. Ndaj ata do të gjykohen si të akuzuar nga dhoma penale.
Prokuroria e Tiranës i dyshon për shpërdorim detyre, duke nisur nga shpallja e vendeve vakante, krijimi i komisionit për vlerësimin e kandidaturës, testimi, deri tek nënshkrimi i urdhrit të punësimit me motivimin “për nevoja emergjente”.
Shtetasi Muci Shaljani, siç deklaron prokuroria, në mbyllje të hetimeve u punësua me procedurë në shkelje të ligjit për një kohë shumë të shkurtër, brenda një jave, ndërkohë që pas vrasjes së tij në shtator 2025 rezultoi se specialisti i AMP nuk ishte paraqitur asnjëherë në detyrë, por ndërkohë ishte paguar.
Top Channel
