Polemikat në botën e futbollit janë ndezur pas përplasjes verbale mes ish-portierit paraguajan José Luis Chilavert dhe gardianit të Real Madrid, Thibaut Courtois.
Debati nisi pasi Chilavert kishte bërë komente për Vinícius Júnior, të cilat u kritikuan nga Courtois. Portieri belg deklaroi se “nuk mund të thuash gjëra të tilla”, duke i cilësuar fjalët e paraguajanit si një formë fyerjeje.
Megjithatë, reagimi i Chilavert ishte i ashpër dhe personal. Ai sulmoi jo vetëm qëndrimin e Courtois, por edhe të kaluarën e tij, duke përmendur një episod të vjetër që lidhet me ish-shokun e skuadrës, Kevin De Bruyne. “Ai flet për moral, por vetë i ka marrë të dashurën një shoku skuadre dhe pastaj thotë se gjëra të tilla nuk duhet të ndodhin në botë”, u shpreh ish-portieri.
Chilavert shtoi gjithashtu deklarata të forta mbi vlerat shoqërore, duke theksuar se në Amerikën e Jugut familja zë një vend qendror dhe duhet të mbrohet me çdo kusht. Fjalët e tij kanë ngjallur reagime të shumta si në Amerikën Latine, ashtu edhe në Europë, duke rihapur debatet mbi etikën, komunikimin publik dhe kufijtë e kritikës në futbollin modern.
I njohur për stilin e tij të drejtpërdrejtë dhe shpesh provokues, Chilavert edhe një herë ka qenë në qendër të vëmendjes, duke e çuar polemikën përtej fushës së lojës.
Top Channel
