Kaos në parlamentin turk/ Deputetët e Erdogan dhe të opozitës përfshihen në një sherr me grushte 22/12 09:48
Partia Popullore (PP, djathtas) fitoi zgjedhjet e reja rajonale në Extremadura, në Spanjën perëndimore, të dielën, ku socialistët e kryeministrit Pedro Sanchez, të përfshirë në skandale, pësuan një humbje të rëndë, ndërsa e djathta ekstreme rriti poziten e saj.
PP siguroi 43% të votave, që do të thotë se do të marrë 29 nga 65 vendet në parlamentin rajonal – krahasuar me 28 në atë që po largohet – sipas rezultateve zyrtare pothuajse përfundimtare, me 99% të fletëvotimeve të numëruara.
Rezultati sugjeron që partia tradicionale e së djathtës spanjolle do të ketë nevojë për mbështetje nga partia e ekstremit të djathtë Vox për të qeverisur. Kjo e fundit pa që vendet e saj u rritën nga 5 në 11 (pothuajse 17% të votave).
PSOE humbi 14 pikë dhe 10 vende: me një përqindje prej pak më pak se 26%, ajo do të fitojë vetëm 18 vende në parlamentin rajonal që për shumë vite konsiderohej si bastioni i saj – qeverisi atje deri në vitin 2023.
Zgjedhjet e parakohshme në rajonin me një ekonomi kryesisht bujqësore, i cili ka një popullsi prej rreth 1 milion banorësh, ishin procesi i parë i tillë pasi një gjykatë urdhëroi ish-Ministrin e Transportit José Luis Ávalos, një aleat i ngushtë i zotit Sánchez, të dilte në gjyq për akuza korrupsioni.
Në paraburgim në pritje të gjyqit, Ávalos akuzohet për marrje ryshfeti për të dhënë kontrata publike. Prokuroria po kërkon një dënim me 24 vjet burg. PSOE, të cilës ai iu bashkua në vitin 1981, e përjashtoi atë.
Hetime të tjera për korrupsion po synojnë gruan e Sánchez, Begona Gómez, dhe vëllain e tij më të madh, kompozitorin dhe dirigjentin David Sánchez.
Ky i fundit akuzohet për shfrytëzimin e ndikimit politik dhe udhëheqjes qeveritare të vëllait të tij për të siguruar një pozicion në vitin 2017 si drejtues i arteve dhe argëtimit në qeverinë provinciale të Badajoz, në jugperëndim të Extremadurës.
Ai pritet të dalë në gjyq për ushtrim ndikimi në maj 2026 së bashku me dhjetë të pandehur të tjerë, përfshirë kandidatin socialist për presidencën e Extremadurës, Miguel Ángel Gallardo.
PSOE është kritikuar gjithashtu javët e fundit për paaftësinë e saj të dyshuar për t’u marrë me rastet e ngacmimit seksual që përfshijnë zyrtarë të lartë.
Top Channel
