Një shqiptar ka pranuar fajin për përfshirjen e tij në një operacion të dështuar trafikimi të qenieve njerëzore, për të transportuar ilegalisht pesë shqiptarë nga Belgjika në Mbretërinë e Bashkuar përmes një kamioni.
Ibrahim Sollaku, 33 vjeç, i cili jeton në Southampton, u arrestua më 5 nëntor në Bournemouth, si pjesë e një operacioni të përbashkët ndërkombëtar mes Njësisë Rajonale të Krimit të Organizuar të Jugperëndimit (SWROCU) dhe organeve të zbatimit të ligjit në Belgjikë.
Sipas asaj që bën me dije policia e Dorset, të cilës i referohet Top Channel, Sollaku u shfaq para Gjykatës së Kurorës në Winchester më 15 dhjetor, ku pranoi se kishte marrë pjesë në një komplot për të ndihmuar emigracionin e paligjshëm në Mbretërinë e Bashkuar dhe mbajtjen me qëllim shpërndarjen e drogave të klasës A pas sekuestrimit të mbi 90 doza droge kokainë nga shtëpia e tij.
Në kuadër të këtij hetimi, i cili përfshinte arrestime të ndodhura njëkohësisht në Mbretërinë e Bashkuar dhe Belgjikë, u zbuluan pesë burra shqiptarë që po përpiqeshin të udhëtonin ilegalisht drejt Mbretërisë së Bashkuar. Përveç arrestimit të Sollaku, një burrë 55-vjeçar nga Bournemouth i cili u arrestua në të njëjtën kohë, i është dhënë masa e garancisë policore dhe ai mbetet në pritje.
Inspektori Kryesor i Krimeve Adam Smith, nga SWROCU, komentoi: “Kriminelët si Sollaku kërkojnë të përfitojnë nga mundësitë e paligjshme, duke lehtësuar udhëtime të paligjshme dhe duke i ngarkuar ata me tarifa të larta që shpesh ndihmojnë në forcimin e rrjeteve të tyre kriminale. Këto rrjete jo vetëm që shkaktojnë dëme në komunitetet tona përmes shpërndarjes së drogës, por edhe shfrytëzojnë individë të pambrojtur. Sa më shumë informacion të kemi për identifikimin e të dyshuarve dhe viktimave të mundshme, aq më shumë mund të synojmë rrjetet pas këtyre veprimeve.”
Sollaku pritet të dënohet më 15 janar 2026.
Top Channel
