Tension në Francë para ndeshjes së Europa League, 102 tifozë të Romës arrestohen për posedim armësh

Sipas gazetës L’Equipe, 102 persona “në posedim të armëve” janë arrestuar dhe dërguar në paraburgim, njoftoi policia e departamentit Alpes‑Maritimes.

Incidentet ndodhën në Place Masséna, në qendër të qytetit rivieras, ku disa tifozë, duke qenë të ulur në tarracën e një restoranti, filluan të hidhnin gota drejt policisë, që shkaktoi një ndjekje nëpër rrugët e Nisë së Vjetër. Disa nga të arrestuarit mbanin balaklava për të mos u identifikuar.

Për të frenuar trazirat, mbi 200 oficerë policie dhe xhandarë, përfshirë dy njësi të lëvizshme, u vendosën në zonat kryesore të qytetit. Tifozëve u sekuestruan sende të forta dhe objekte të rrezikshme si shufra hekuri, doreza fshesash, tuba plastike, lopata, thika dhe çekiçë. Të arrestuarit u transferuan në stacionet policore dhe më pas iu dërguan gjykatave sipas urdhrit të prokurorit të Nisë.

Prefektura e Alpes‑Maritimes paralajmëroi se mbrëmjen vijëse do të angazhohen më shumë se 400 forca sigurie, të uniformuara dhe civile, për një prezencë të dukshme dhe për të parandaluar përshkallëzimin e dhunës.

Avokati Lorenzo Contucci, përfaqësues ligjor i disa tifozëve, komentoi se arrestimet nuk janë arrestime përfundimtare, por masa ndalimi që zgjat 24 orë në pritje të provave: “Nëse nuk gjenden prova, ata duhet të lirohen; vetëm ata kundër të cilëve provat ekzistojnë mund të mbeten të arrestuar.”

Ai theksoi se në ngjarje të ngjashme, masa të tilla ndalimesh shpesh aplikohen pa dallim ndaj individëve në ambiente publike.

Ky episod rikthen kujtesën e trazirave të vitit 2013 në Varshavë, ku tifozë të Lazios u ndaluan para ndeshjes Europa League me Legia Varshavën. Dhe pse numrat e arrestimeve mund të jenë më të ulët, përplasjet dhe sulmet ndaj forcave të rendit kanë sjellë paralajmërime për përshkallëzime të mundshme në raste të ngjashme.

Top Channel