Kërcënoi Drejtorin e Spitalit të Durrësit që t’i merrte mbesën në punë, nis hetimi për 41-vjeçarin 20/09 14:48
Në një nga kafenetë më luksoze të Pretorias, Goddess Café në lagjen e pasur Waterkloof, Oscar Pistorius u pa duke drekuar me partneren e tij të re, Rita Grayling.
Restoranti, i njohur për estetikën e tij rozë dhe pjatat e dekoruara me petale trëndafili, është një pikë takimi për të rinj të pasur dhe influencues.
Atje, ish-kampioni paralimpik dhe partnerja e tij 33-vjeçare dukeshin se shijonin shoqërinë e njëri-tjetrit, duke mbajtur duart dhe duke shkëmbyer vështrime të buta. “Oscar është i magjepsur nga Rita, duket se janë thellësisht të dashuruar”, komentoi një person nga mjedisi i tyre.
Ngjashmëria e Ritës me të ndjerën Reeva Steenkamp, gruan që Pistorius vrau në Ditën e Shën Valentinit në vitin 2013, nuk ka kaluar pa u vënë re. Burime pranë Pistorius thonë se 38-vjeçari e ka lënë pas të kaluarën dhe po përpiqet të fillojë një jetë të re me trashëgimtaren mahnitëse.
Pistorius, i cili u lirua me kusht në janar 2024, u është rrëfyer miqve se dëshiron të martohet dhe të krijojë familje me Ritën. Ai gjithashtu po përpiqet të kthehet në sport.
Në qershor, ai garoi në një triatlon në Durban, duke u renditur i treti në kategorinë e personave me aftësi të kufizuara. Me mbështetjen e mjekëve dhe trajnerëve, ai po punon për të rifituar formën e tij fizike pas kohës së kaluar në burg.
Ai është kthyer edhe në fe, duke marrë pjesë në aktivitetet e kishës që ndjek familja e tij. Ata që e njohin thonë se kjo kthesë shpirtërore është pjesë e përpjekjeve të tij për të “ndërtuar një identitet të ri”.
Kush është Rita Grayling: Personi që ndryshoi jetën e Oscar Pistorius?
Rita Grayling është gruaja që ka qenë në lajme në median e Afrikës së Jugut dhe atë ndërkombëtare kohët e fundit, pasi ajo është lidhur me ish-kampionin paralimpik Oscar Pistorius. Prania e saj në krah të atletit, i cili u lirua me kusht në janar 2024, ka ngjallur interes të madh, pasi ajo paraqitet si personi që shënon fillimin e tij të ri.
Ajo është 33 vjeçe dhe vjen nga një familje e pasur me rrënjë të thella në traditën bujqësore të Afrikës së Jugut. Babai i saj, Burard Petrus (BP) Grayling, është një fermer i njohur në rajonin Bapumalangga dhe familja menaxhon një pronë të madhe bujqësore në Wakerstroom. Historia e tyre shtrihet në më shumë se njëqind vjet prani në vend, me origjinë që shkon deri në Luftën e Boerëve.
Familja ka ndikim të konsiderueshëm ekonomik dhe shoqëror. Babai i saj ka deklaruar në të kaluarën se dëshiron që vajzat e tij të martohen me “burra që dinë të kujdesen për tokën”, duke shprehur rëndësinë që u kushton vlerave familjare dhe një lidhjeje me traditën.
Beteja e June Steenkamp
Ndërsa Pistorius duket se po e lë të kaluarën pas, 78-vjeçarja June Steenkamp, nëna e Reeva-s, është shtruar në spital në gjendje kritike pasi pësoi një goditje të rëndë në tru.
Sipas miqve të familjes, June ka humbur shumë nga kujtesa dhe të folurit e saj, duke çuar në frikë se ajo mund të mos e njohë as vajzën e saj.
“Ajo nuk mund të flasë qartë, nuk njeh fytyra dhe nuk e di emrin e saj”, tha një person i afërt me familjen.
Situata është veçanërisht e rëndë, pasi June ia kishte kushtuar jetën e saj kujtimit të Reevës, duke themeluar një organizatë për të rritur ndërgjegjësimin për dhunën ndaj grave dhe fëmijëve.
Steenkamp kishte vite që vuante financiarisht. Ajo ishte detyruar ta nxirrte shtëpinë e saj në shitje, ndërsa jetonte në një fermë të vogël pranë Port Elizabeth me kafshët e saj. Ajo kishte planifikuar të kthehej në Britani, ku jeton vajza e saj e madhe, Simone, dhe tashmë kishte lëshuar një pasaportë për qenin e saj. Por goditja në tru ia përmbysi planet.
“June tha se kishte bërë gjithçka që mundi për të qenë zëri i Reevës dhe donte ta jetonte pjesën tjetër të jetës së saj në paqe”, shpjegon shoqja dhe avokatja e saj, Tanya Cohen. Megjithatë, sot po zhvillohet një betejë për të siguruar shpenzimet e saj mjekësore.
Kontrasti është i fortë. Pistorius jeton në rezidencën luksoze të xhaxhait të tij në Pretoria dhe planifikon të ardhmen e tij me Ritën, ndërsa June përballet me probleme serioze shëndetësore dhe vështirësi financiare
Pavarësisht faktit se ai do të mbetet nën kufizime të rrepta deri në vitin 2029 – me ndalim të pirjes së alkoolit, përdorimit të mediave sociale dhe kontrolleve të papritura nga mbikëqyrësi i tij, Pistorius duket i vendosur të shfrytëzojë sa më shumë shansin e tij të dytë.
Megjithatë, për familjen Steenkamp, humbja e Reeva mbetet një plagë e hapur. “I vetmi ngushëllim për mua do të ishte nëse Reeva do të mund të kthehej”, thoshte nëna e saj.
Top Channel
