Bazuar në legjislacionin veterinar dhe Kodin doganor, pikat e lejueshme të kalimit për mallin e kërkuar, nga kufiri me Greqinë, janë vetëm Kapshtica dhe Kakavija. Në asnjë pike tjetër doganore me shtetin fqinj nuk mund të bëhen lëvizje të tjera të kontrolluara.
Por si bëhet kontrabanda në kufirin grek dhe si i shmangin kontrollet e policisë dhe Frontexit, agjencisë europiane të ruajtjes kufitare dhe bregdetare?
“Ka disa mënyra për të shmangur kontrollet e policisë ose Frontexit. Fermerët lidhen me fermat në Greqi dhe më pas, mundohen të tejkalojnë kafshët e imta e gjedhët, ose nga kufijtë tokësore, në fshatrat më të afërt, ose nëpërmjet doganave, ku bien dakord. Gjysmën e kafshëve nuk i deklarojnë, ndërsa gjysmën tjetër i deklarojnë. Në këtë mënyrë kemi të bëjmë me raste të mirëfillta kontrabande që nis nga pika A deri në Zh. Unë personalisht kam pasur disa raste që kam tentuar ti bllokoj” u shpreh veterineri, Baki Myrtellari
Pavarësisht se Drejtoria e Përgjithshme e Doganave shprehet se është konstatuar vetëm një rast parandalues kontrabande në vitin 2023, Inside Story ka arritur të sigurojë dokumentacionin e ndalimit të 78 krerëve bagëti dy thundrake.
Më date 11 maj 2024 u ndalua tufa prej 61 lopësh dhe 17 viçash, e pronarit Maksi Malo, në Ersekë. 13 krerë lope dhe vica ishin të pajisur me matrikuj grekë sipas procesverbalit.
“Oficeri i Policise Gjyqesore prane Drejtorise Vendore te Komisariatit të Korçës, në kuadër të veprimeve proceduriale që po kryen për veprën penale të “Kontrabandës me mallrat të tjera” në ngarkim të shtetasit Maksi Malo, mban këtë procesverbal për lënien dhe ruajtjen e provave materiale si më poshtë. Një tufë gjedhë, dythundrakë me ngjyrë të kuqremtë, të bardhë, të zezë dhe laramane, ku 13 prej tyre të pajisur me matrikull të shtetit grek.
Nga numërimi i krerëve rezulton se janë gjithsej 78 krerë bagëti dy thundrake së mëposhtë:
61 lopë me karakteristika me ngjyrë të kuqremtë me moshë të papërcaktuar. 17 vica të moshës nga 3 deri në 6 muaj me ngjyrë dominues të kuqeremtë.
Përveç këtij rasti që qartësisht kuptohet se ka qenë tentativë kontrabande dhe rasteve të padokumentuara, apo kapura nga ana e institucioneve, ka pasur dhe shkelje të tjera. Në disa raste janë vendosur gjoba ndaj subjekteve të ndryshme për shkak të thyerjes së karantinimit të detyrueshëm të kafshëve të imta, apo gjedhëve. Megjithatë, kjo është vetëm maja e ajsbergut e kësaj problematike me kafshët e imta dhe gjedhët…
Top Channel
