Akuzohet për spiunazh në favor të Rusisë dhe Iranit, arrestohet punonjësi i ambasadës amerikane në Oslo 22/11 22:38
Shtetet e Bashkuara do të vendosin raketa me rreze të gjatë veprimi në Gjermani në vitin 2026, me qëllimin të forcohet mbrojtja e Europës përballë kërcënimeve ruse në rritje.
Ekspertët e konsideruan dislokimin e rëndësishëm ushtarak si një paralajmërim të hapur ndaj presidentit Vladimir Putin. Në deklaratën e përbashkët amerikano-gjermane nënvizohet se “dislokimi në faza” përbën një përgatitje për stacionim afatgjatë në Evropë të kapaciteteve luftarake ku do të përfshihen raketa të tipit Tomahawk dhe armë hipersonike me rreze më të gjerë veprimi.
“Nuk mund të përjashtojmë mundësinë e një sulmi kundër sovranitetit dhe integritetit territorial të aleatëve”, thonë aty aleatët. Deklarata e lëshuar nga krerët e shteteve dhe qeverive që marrin pjesë në takimin e NATO-s në Washington, përcillte gjithashtu synimin për t’i ofruar Ukrainës ndihmë ushtarake me një vlerë prej 40 miliardë euro brenda vitit të ardhshëm.
Aty ra në sy veç të tjerash edhe fakti që përdoret një gjuhë më e ashpër ndaj Kinës, e cila përshkruhet si “mundësuese e përpjekjeve” luftarake të Rusisë ndaj Ukrainës, ndërsa theksohet se Pekini vazhdon të paraqesë sfida sistematike për sigurinë euro-atlantike. Ballkani Perëndimor dhe rajonet e Detit të Zi kanë një rëndësi strategjike për aleancën dhe NATO-ja mbetet fuqimisht e përkushtuar ndaj sigurisë dhe stabilitetit të tyre, thuhet në dokument.
“Ne do të vazhdojmë të përmirësojmë dialogun tonë politik dhe bashkëpunimin praktik me Ballkanin Perëndimor për të mbështetur reformat, paqen dhe sigurinë rajonale dhe të luftojmë kundër ndikimit malinj, përfshirë dezinformimin, kërcënimet hibride dhe kibernetike nga aktorë shtetërorë dhe aleatët e tyre. Dokumenti thekson rëndësinë e vlerave demokratike, shtetin e së drejtës, reformat e brendshme dhe marrëdhëniet e fqinjësisë së mirë si jetike për bashkëpunimin rajonal dhe integrimin euroatlantik”, thuhet në pikën për Ballkanin.
“Mbetemi të përkushtuar ndaj angazhimit të vazhdueshëm të NATO-s në Ballkanin Perëndimor, përfshirë forcat paqeruajtëse të KFOR-it në Kosovë të udhëhequra nga NATO”, thekson komunikata.
Top Channel
