Gjenerali amerikan mbështet shkatërrimin e grupeve të lidhura me Iranin

Zoti Votel, ish-komandanti i Forcave Amerikane që mbulon edhe rajonin e Lindjes së Mesme, thotë se një gjë e tillë, do të dobësonte kontrollin e Teheranit ndaj këtyre grupeve militante. Megjithatë, sipas tij, përparësi për Uashingtonin duhet të mbetet një zgjidhje e qëndrueshme në Gazë, që paraqet burimin e konfliktit në Lindjen e Mesme.

Shtetet e Bashkuara dhe aleatët e saj perëndimorë kryen sulme ndaj rebelëve në Jemen të shtunën, ndërsa të premten ushtria amerikane goditi dhjetra objektiva në Irak dhe Siri që përdoren nga grupet e mbështetura nga Irani dhe Garda Revolucionare iraniane. Uashingtoni ndërmori këtë hap si kundërpërgjigje ndaj sulmit ndaj një baze ushtarake në Jordani, ku si pasojë u vranë 3 ushtarë amerikanë dhe u plagosën rreth 40 të tjerë.

Tensioni është rritur që pas luftës mes Izraelit e Hamasi në fillim të tetorit. Rebelët e mbështetur nga Irani kanë intensifikuar sulmet ndaj ushtrisë amerikane dhe anijeve tregtare ndërkombëtare në rajon. Gjenerali në pension i ushtrisë amerikane, i Komandës Qëndrore që mbulon ndër të tjera rajonin e Lindjes së Mesme, Joseph Votel thotë se vazhdimi i ndërhyrjeve për të shkatërruar rrjetet e lidhura me Iranin do të dobësonte kontrollin e Teheranit mbi to.

“Sa më shumë të shkatërrojmë këto rrjete aq më pak kontroll do ketë Irani mbi këto organizata. Një nga gjërat më të rëndësishme që mund të vazhdojmë të bëjmë është të sigurohemi që të mbajmë përgjegjës për këtë Iranin. Mendoj se ky është një mesazh shumë kritik dhe i rëndësishëm. Dhe në fakt mendoj se administrata po bën një punë mjaft të mirë në këtë drejtim”, tha gjenerali Votel.

Sipas gjeneralit Votel, përpjekjet për të arritur një zgjidhje paqësore në Gazë paraqesin ndoshta veprimin më të rëndësishëm që mund të ndërmarrin Shtetet e Bashkuara për të ndalur dhunën nga ana e militantëve.

“Mendoj se përpjekja për të arritur një zgjidhje për situatën në Gazë është gjëja më e rëndësishme që mund të bëjmë. Mendoj se situata në rajonin e Rripit të Gazës po nxit rritjen e dhunës në Detin e Kuq si dhe në Irak dhe Siri. Prandaj marrja e një hapi që mund të sillte qëndrueshmëri është një hap i rëndësishëm”, tha zoti Votel.

Shtetet e Bashkuara, paralajmëruan të dielën Iranin dhe rebelët që mbështeten financiarisht dhe me armatime prej tij, se do të vazhodojë të kryejë sulme të tjera nëse forcat amerikane në Lindjen e Mesme do të jenë objektiv i goditjeve të rebelëve, por se Uashingtoni nuk synon një fushatë ushtarake përgjatë rajonit./VOA

Top Channel