Instituti Kombëtar i Statistikave ka publikuar të dhënat më të fundit për hyrjen dhe daljen e shtetasve shqiptarë apo atyre të huaj në/nga territori i Shqipërisë, për periudhën shtator, krahasuar me një vit më parë.
Sipas të dhënave të Instat në muajin shtator kanë hyrë 1 milion e 651 mijë e 151 shtetas shqiptarë dhe të huaj në territorin e Shqipërisë. Tregues ky, i cili sipas raportit, rezulton me një rritje 36,6 %, krahasuar me shtatorin e vitit 2022.
Instat thekson se numri i shtetasve shqiptarë që kanë hyrë në vend shtatorin e këtij viti është 546.961, pra 22,3 % më shumë krahasuar me shtatorin e 2022. Sakaq, numri i shtetasve të huaj që kanë hyrë në territorin shqiptar është 1 milion e 104 mijë e 190 persona, pra 45,0 % më shumë, krahasuar me të njëjtën periudhë të një viti më parë.
Nga ana tjetër, sa iu përket daljeve të shtetasve shqiptarë dhe të huaj nga territori i Shqipërisë, gjatë muajit Shtator 2023, ato janë 1 milion e 714 mijë e 585, duke shënuar një rritje me 25,0 %, krahasuar me Shtatorin e 2022.
Sipas raportit të Instat, “daljet e shtetasve shqiptarë nga territori i Shqipërisë, gjatë muajit Shtator 2023 janë 614.086. Krahasuar me Shtator 2022, ky tregues është rritur me 13,5 %.
Daljet e shtetasve të huaj nga territori i Shqipërisë gjatë muajit Shtator 2023, janë 1.100.499. Krahasuar me Shtator 2022, ky tregues është rritur me 32,5 %.”
Në Shtator 2023, rajoni me numrin më të lartë të hyrjeve të shtetasve të huaj në Shqipëri është rajoni i Evropës me 1.059.798 shtetas, pasuar nga Amerika dhe Azia Lindore /Paqësori, përkatësisht me 29.236 dhe 8.958 shtetas.
Në Shtator 2023, krahasuar me Shtator 2022, hyrjet e shtetasve të huaj shënojnë:
– rritje, për qëllime personale me 46,8 %;
– rritje, për qëllime pushime, vizitë tek të afërm, etj. me 46,1 %;
– rënie, për biznes dhe qëllime profesionale me 34,7 %.
Gjatë nëntëmujorit 2023, numri i shtetasve të huaj që kanë hyrë në territorin shqiptar është 8.294.600; 29,0 % më shumë sesa në të njëjtën periudhë të vitit 2022.
Ndërkaq, numri i shtetasve shqiptarë të dalë nga territori i Shqipërisë gjatë nëntëmujorit 2023, është 5.191.839, 18,2 % më shumë krahasuar me të njëjtën periudhë të një viti më parë.
Top Channel
