Një person është arrestuar në Mat, pasi përdorte lavazhin e marrë me qira për të kamufluar shpërndarjen e lëndëve narkotike, kokainë dhe kanabis.
Nga të dhënat paraprake bëhet me dije se i arrestuar ka mbetur një 32-vjeçar me inicialet L. H., si dhe punonjësi i lavazhit J. P., 39 vjeç. Sakaq, është proceduar në gjendje të lirë pronari i lavazhit, Y.N., pasi gjatë operacionit iu gjet një pushkë sportive.
Gjatë kontrollit fizik të 32-vjeçarit dhe kontrollit në ambientet e lavazhit që ai kishte marrë me qira, shërbimet e Policisë gjetën dhjetëra doza kanabisi, një sasi kanabisi gati për paketim dhe doza kokaine, të cilat u sekuestruan në cilësinë e provës materiale. Gjatë kontrolit fizik, një sasi e caktuar kokaine e ndarë në doza, i është gjetur edhe punëtorit të lavazhit.
Po ashtu, gjatë kontrollit në ambientet e lavazhit, Policia gjeti dhe sekuestroi edhe 10 targa automjetesh shqiptare dhe të huaja, që dyshohet se shtetasi L. H. i përdorte për automjete të ndryshme, me qëllim që të kamuflonte veprimtarinë kriminale, fishekë për armë gjahu, si dhe pushkën sportive që i përkiste pronarit të lavazhit.
Materialet procedurale do t’i refrohen Prokurorisë pranë Gjykatës së Shkallës së Parë të Juridiksionit të Përgjithshëm Dibër, për veprime të mëtejshme.
Top Channel
