Kandidati prorus prin në zgjedhjet presidenciale në Rumani 25/11 08:36
Mijëra protestues iu bashkuan sot demonstratave të disa ditëve në kryeqytetin indonezian Xhakarta, kundër vendimit të qeverisë për rritjen e çmimeve të energjisë.
Protestat kundër rritjes së çmimeve janë përhapur në disa qytete të arqipelagut me shumicë muslimane.
Protestuesit kërkonin anullimin e vendimit të qeverisë për rritjen e çmimeve, duke thënë se kjo lëndon popullatën që sapo doli nga pasojat e rënda ekonomike të pandemisë.
Autorititetet kishin bllokuar rrugët që shkonin në drejtim të pallatit presidencial teksa demonstruesit shumica muslimanë, mbanin flamurë kombëtarë dhe islamikë, shkruan rrjeti AFP.
Çmimet e karburanteve u rritën me rreth 30% prej muajit të kaluar që kur administrata e presidentit Joko Vidodo vendosi të anullojë subvencionet, sipas tij për të mbushur deficitin kombëtar.
Çmimi i benzinës u rrit nga 51 cent në 67 cent për litër, ndërsa i naftës nga 35 cent në 46 cent, sipas AFP.
Protestat në disa qytete kryesore të Indonezisë janë kryesuar nga punëtorët e studentët, por kanë ardhur duke u ashpërsuar.
Organizatori Ahmad Khozinudin tha në fjalën e tij se popullsia po vuante pasojat e COVID-19 dhe rritja e çmimeve shton problemet e tyre.
Ai shtoi se qeveria e Vidodo “nuk është kujdesur për varfërinë në vend”, dhe se “ka shkelur premtimin ndaj popullit për të mos rritur çmimet e karburanteve”.
Protestuesit që brohorisnin “Zoti është i madh” dhe “Ne jemi me punëtorët”, bllokuan disa rrugë të kryeqytetit.
“Vendimi i qeverisë për rritjen e çmimeve të karburanteve është i padrejtë!” tha protestuesi Budi Darma.
“Kjo sjell rritjen e çmimeve të mallrave të tjera si ushqimet bazë dhe lëndon drejtpërdrejt më të varfrit”, shtoi ai.
Top Channel
