“Kishim pëlqim reciprok”/ Zbardhet dëshmia e Marius Musakut, vendi ku e mbajti një javë peng 30-vjeçaren

Në polici Musaku ka deklaruar se ka pasur njohje dhe pëlqim reciprok me të renë, por është kundërshtuar prej saj bashkëjetesa që ai i ka kërkuar. Pas kundërshtimit të saj, ai e ka mbajtur pa dëshirë në banesën e Spitallës, duke e kërcënuar, sipas deklarimeve të saj, me jetën e bashkëshortit dhe dy fëmijëve në rast se nuk do të pranonte të jetonin bashkë.

Nga hetimet e para rezulton se Musaku, person me precedentë penale në marrëdhënien me ish-bashkëshorten e tij, e ka mashtruar dhe joshur 30-vjeçaren dhe pasi kanë shkuar në banesë i ka kërkuar që të bashkëjetojnë.

Familjarët kanë rënë në gjurmët e Ersidës që në fundjavën e kaluar dhe në një komunikim me TCH kanë pohuar se ajo është në gjendje të mirë. Kanë mundur të marrin informacion për vendndodhjen e saj. Pas arrestimit të Musakut, bashkëshorti i 30-veçares deklaroi se nuk kanë asgjë për të deklaruar pas kësaj ngjarjeje, që i ka tronditur rëndë, ndërsa e shoqja ndodhet në gjendje të mirë dhe është kthyer në banesë.

Ndaj Musakut rëndon akuza e “Heqjes së paligjshme të lirisë”, “Shtrëngim për të bashkëjetuar ose për të lidhur apo zgjidhur martesë”, si dhe“Marrëdhënie seksuale me dhunë me të rritura”. Me arsim 8-vjeçar dhe i divorcuar, Musaku ka tentuar të krijojë një marrëdhënie të re me 30-vjeçaren, ndërsa në nëntor të 2018-s, kishte marrë peng për 24 orë dhe ish- bashkëshorten nga shtëpia e prindërve, e cila i kishte kërkuar në atë kohë divorcin.

Në të dyja rastet rezulton se i riu nga Lushnja ka reaguar në të njëjtën mënyrë të paligjshme ndaj kundërshtimit që ka marrë nga gratë për të cilat ka pasur interes.

Top Channel